హింసాత్మక, అస్తవ్యస్త సమాజానికి బౌద్ధ ధర్మమే శరణ్యం బేతాళ సుదర్శన్

జంగారెడ్డిగూడెం-మేజర్ న్యూస్ హింసాత్మక, అస్తవ్యస్త సమాజంలో శాంతి, సమానత్వం, మానవత్వం నెలకొనాలంటే బౌద్ధ ధర్మమే శరణ్యమని భారతీయ బౌద్ధ మహాసభ రాష్ట్ర అధ్యక్షుడు బేతాళ సుదర్శన్ అన్నారు. బోధిసత్వ డాక్టర్ బాబాసాహెబ్ అంబేద్కర్ బౌద్ధ ధర్మ స్వీకరణకు గుర్తుగా జంగారెడ్డిగూడెంలో నిర్వహించిన బౌద్ధ సమ్మేళనానికి బౌద్ధాచార్యుడు డా అలుగు ఆనంద శేఖర్ అధ్యక్షత వహించారు. 

ఈ సందర్భంగా బేతాళ సుదర్శన్ మాట్లాడుతూ, ప్రపంచ ఆధ్యాత్మిక చరిత్రలో 1956 అక్టోబర్ 14వ తేదీకి విశేష ప్రాధాన్యత ఉందన్నారు. డా. బి.ఆర్. అంబేద్కర్ బౌద్ధ ధర్మాన్ని స్వీకరించిన సందర్భంగా నాగ్‌పూర్‌లో జరిగిన కార్యక్రమానికి లక్షలాది మంది హాజరయ్యారని గుర్తుచేశారు. చరిత్రకారులు ఐదు నుంచి ఆరు లక్షల మంది పాల్గొన్నట్లు పేర్కొన్నప్పటికీ, ప్రత్యక్ష సాక్షుల కథనాలు, పరిశోధనాత్మక వివరాల ప్రకారం పది లక్షల మందికి పైగా హాజరై ఉండవచ్చని ఆయన పేర్కొన్నారు.

బౌద్ధ ధర్మంలో జ్ఞానానికి, మానవత్వానికి, భౌతిక జీవనానికి సంబంధించిన అంశాలకు ప్రాధాన్యత ఉంటుందని వివరించారు. దేవుడి పేరుతో జరిగే ఆర్థిక, సామాజిక, సాంస్కృతిక దోపిడీకి బౌద్ధ ధర్మంలో స్థానం లేదని ఆయన స్పష్టం చేశారు. మానవుల మధ్య సమానత్వం, వివేకం, పరస్పర గౌరవం పెంపొందించడమే బౌద్ధ ధర్మంలోని ప్రధాన సందేశమని పేర్కొన్నారు.

ఈ కార్యక్రమంలో డా. సుబ్బారావు, మల్లవరపు సత్యనారాయణ, బీఎస్పీ జిల్లా అధ్యక్షుడు సిర్రా భరత్, కలపాల రాజకుమార్, బ్యాటరీ నాగు, శివకుమార్, మొల్ల సురేష్, కోటినిస్, సత్యనారాయణ, దావీదు, గంటా రామారావు తదితరులు పాల్గొన్నారు.