ఎన్నికల నియమావళి అమలులో నిర్లక్ష్యం వహిస్తే సస్పెన్షన్ తప్పదు

విజయవాడ కార్పొరేషన్ మేజర్ న్యూస్: ఎన్నికల ప్రవర్తనా నియమావళి అమలులో ఎలాంటి నిర్లక్ష్యానికి తావులేదని, విధుల్లో అలసత్వం వహించే అధికారులు, సిబ్బందిపై సస్పెన్షన్‌తో సహా కఠిన క్రమశిక్షణా చర్యలు తీసుకుంటామని విజయవాడ నగరపాలక సంస్థ కమిషనర్ ధ్యానచంద్ర హెచ్చరించారు. ఎన్నికల షెడ్యూల్ విడుదలైన నేపథ్యంలో గురువారం ఎన్నికల విధుల నిర్వహణ, నియమావళి అమలుపై అధికారులకు పలు ఆదేశాలు జారీ చేశారు. నగరంలోని రాజకీయ నాయకుల విగ్రహాలకు ముసుగులు వేయడం, రాజకీయ పోస్టర్లు, బ్యానర్లు, ప్రచార సామగ్రిని నిబంధనల ప్రకారం తొలగించడం వంటి చర్యలను నిర్దేశిత గడువులోగా పూర్తి చేయాలని సూచించారు. ఎన్నికల విధులకు కేటాయించిన అధికారులు, సిబ్బంది తమ బాధ్యతలను సక్రమంగా నిర్వర్తించాలని, క్షేత్రస్థాయిలో చేపట్టిన చర్యలను నిరంతరం పర్యవేక్షించాలని స్పష్టం చేశారు. పోలింగ్ కేంద్రాల పరిధిలో వర్తించే 100 మీటర్ల నిబంధనను కచ్చితంగా అమలు చేయాలని, ఎన్నికల ప్రచార నిబంధనల ఉల్లంఘనలు జరగకుండా నిఘా ఉంచాలని ఆదేశించారు. ఉల్లంఘనలు గుర్తించిన వెంటనే నిబంధనల మేరకు చర్యలు తీసుకోవాలని తెలిపారు. ఎన్నికల విధుల నిర్వహణలో వివిధ శాఖల అధికారులు పరస్పర సమన్వయంతో పనిచేయాలని, అప్పగించిన పనులను గడువులోగా పూర్తి చేయాలని పేర్కొన్నారు. ఎన్నికల నిర్వహణకు ప్రాధాన్యత ఇస్తూనే ప్రజలకు అందించే సాధారణ పౌర సేవలు, రోజువారీ కార్యకలాపాలకు అంతరాయం కలగకుండా చూడాలని కమిషనర్ ధ్యానచంద్ర ఆదేశించారు. ఎన్నికల ప్రక్రియ సజావుగా సాగేందుకు అధికారులు, సిబ్బంది పూర్తి బాధ్యతతో వ్యవహరించాలని సూచించారు.