ఇంద్రకీలాద్రిపై అమ్మవారు లలితా త్రిపుర సుందరిగా దర్శనం.. కొండదిగువన భక్తి సంగీతం, నృత్య ప్రదర్శనలు

ఇంద్రకీలాద్రి మేజర్ న్యూస్ : దసరా శరన్నవరాత్రి మహోత్సవాల్లో భాగంగా గురువారం శ్రీ కనకదుర్గా నగర్‌లోని ప్రత్యేక కళావేదికపై సాంస్కృతిక, ఆధ్యాత్మిక కార్యక్రమాలు భక్తులను అలరించాయి. ఇంద్రకీలాద్రిపై శ్రీ కనకదుర్గమ్మవారు లలితా త్రిపుర సుందరీదేవిగా దర్శనమివ్వగా, కొండదిగువన భజన కీర్తనలు, భక్తి గీతాలు, హరికథా గానం, శాస్త్రీయ నృత్య ప్రదర్శనలతో ఆధ్యాత్మిక వాతావరణం నెలకొంది. ఉదయం నుంచి రాత్రి వరకు కొనసాగిన కళార్చనలో కళాకారులు తమ ప్రదర్శనలతో భక్తులను భక్తిభావంలో ముంచెత్తారు. బి. సువర్ణకుమారి బృందం సంప్రదాయ తాళ భజనతో కార్యక్రమాలను ప్రారంభించగా, జి. నాగేశ్వరశర్మ, పి.హెచ్.ఎస్. మణికంఠ, ఎం. నాగ సునీత, పి.వి.ఎన్. కామేశ్వరి ఆలపించిన భక్తి సంకీర్తనలు, దేవీ స్తోత్రాలు భక్తులను ఆకట్టుకున్నాయి. హరికథా భాగవతార్ జె. సుధాకర్ భక్త మార్కండేయుని చరిత్రను హరికథా గానం, అభినయంతో వివరించి భక్తులను అలరించారు. అనంతరం చిన్నారులు, యువ కళాకారులు కూచిపూడి, భరతనాట్య ప్రదర్శనలతో అమ్మవారికి నృత్య నీరాజనం సమర్పించారు. డి. పావని, జి. విజయ గౌరి, టి.పి. లావణ్య, ఎస్.కె.వి.ఎన్. శాస్త్రి, ఎం. కీర్తన, కె. శ్రీనివాస్, జి. చాముండి చౌదరి, జి. పావని, వి. మనోజ్ఞ కామేశ్వరి, డి. సాయి లిక్షిత శ్రీ, పి. పూజశ్రీ, డాక్టర్ కె. వరప్రసాద్, యు. వెంకట రామకృష్ణ, పి. గౌరీశ్వరరావు, వై. రాణి, బి.వి.కె.ఎస్. శ్రీకరి, వై. భానుశ్రీ శరిణి తదితరులు దేవీ స్తుతులు, మహిషాసురమర్దిని స్తోత్ర నృత్యాలు, శివతాండవ రూపకాలతో ప్రేక్షకులను ఆకట్టుకున్నారు. ప్రదర్శనలను తిలకించిన భక్తులు ఆధ్యాత్మిక అనుభూతిని పొందారు. కార్యక్రమాల్లో పాల్గొన్న కళాకారులను దేవస్థానం అధికారులు ప్రశంసించి, అమ్మవారి శేషవస్త్రాలు, పవిత్ర ప్రసాదాలు అందజేసి సత్కరించారు.