నారాయణపేటలో అమ్మవారికి భక్తిశ్రద్ధలతో పూజలు

నారాయణపేట, సూర్యన్యూస్:
నారాయణపేట పట్టణంలోని వివిధ ఆలయాల్లో అమ్మవారికి నాల్గవ రోజు ప్రత్యేక పూజలు నిర్వహించారు. వివిధ కాలనీలలో ప్రతిష్టించిన అమ్మవారి విగ్రహాలకు శరన్నవరాత్రి ఉత్సవాల్లో భాగంగా బుధవారం ప్రత్యేక అలంకరణలు చేపట్టారు. ఈ సందర్భంగా పట్టణంలోని శ్రీ అంబాభవాని దేవాలయంలో అమ్మవారు రాధా రాణి రూపంలో దర్శనమిచ్చారు. అదేవిధంగా అశోక్ నగర్ శ్రీ మాలలాంభిక ఆలయంలో అమ్మవారు మహాచండీ దేవి అలంకరణలో కనిపించారు. సింగారం శ్రీగిరి పీఠంపై కొలువైన భవాని మాత మహాచండీ దేవిగా, కోటకొండ కన్యకా పరమేశ్వరి ఆలయంలో వాసవి మాతను వైష్ణవి దేవిగా అలంకరించారు. లోకాయపల్లి లక్ష్మమ్మ దేవాలయంలో అమ్మవారికి కుంకుమార్చన, సింగారంలో వడి నింపుడు కార్యక్రమం నిర్వహించారు. అదేవిధంగా అమ్మవారి దీక్షలు చేపట్టిన భక్తులు ప్రత్యేక పూజలు నిర్వహించారు. శరన్నవరాత్రి ఉత్సవాల్లో భాగంగా భక్తులకు అన్నదాన, ప్రసాద వితరణ చేపట్టారు.
-- రాజేష్ కుమార్, సూర్య రిపోర్టర్ నారాయణపేట.