ఎమ్మెల్యే పై తప్పుడు ప్రచారం మానుకోవాలి

ఎమ్మెల్యేపై తప్పుడు ప్రచారం మానుకోవాలి

దమ్ముంటే అభివృద్ధిపై చర్చించాలి.. ఆడబిడ్డలను రాజకీయాల్లోకి లాగొద్దు

మంచాల సహకార సంఘం చైర్మన్ వెదిరె హన్మంత్ రెడ్డి

ఇబ్రహీంపట్నం ఎమ్మెల్యే మల్‌రెడ్డి రంగారెడ్డిపై సోషల్ మీడియాలో తప్పుడు ప్రచారం చేయడం మానుకోవాలని మంచాల వ్యవసాయ సహకార సంఘం చైర్మన్ వెదిరె హన్మంత్ రెడ్డి బీఆర్‌ఎస్ నాయకులకు సూచించారు. ఎమ్మెల్యే బొంగులూరు ఔటర్ రింగ్ రోడ్డు వద్ద బస్సు ఎక్కి ఇంజాపూర్ వరకు ప్రయాణిస్తూ మహిళలతో మాట్లాడి ఉచిత బస్సు ప్రయాణంపై వారి అభిప్రాయాలను తెలుసుకున్నారని తెలిపారు. ఈ సందర్భంగా ఓ విద్యార్థినితో ఎమ్మెల్యే మాట్లాడుతున్న వీడియోను వక్రీకరించి ప్రచారం చేయడం సరికాదన్నారు. ప్రజాప్రతినిధిగా నియోజకవర్గ ప్రజల సమస్యలను తెలుసుకునే హక్కు ఎమ్మెల్యేకు ఉందని పేర్కొన్నారు. మహిళలను గౌరవిస్తూ, ప్రజలతో ఆప్యాయంగా మెలిగే నాయకుడు మల్‌రెడ్డి రంగారెడ్డి అని అన్నారు. నియోజకవర్గంలో జరుగుతున్న అభివృద్ధి పనులను చూసి ఓర్వలేకే బీఆర్‌ఎస్ నాయకులు ఇలాంటి ప్రచారానికి దిగుతున్నారని విమర్శించారు. రాజకీయాల్లో విమర్శలు, ప్రతి విమర్శలు సహజమని, అయితే మహిళలను అడ్డుపెట్టుకుని వ్యక్తిత్వాన్ని కించపరిచేలా ప్రచారం చేయడం తగదని హన్మంత్ రెడ్డి అన్నారు. నియోజకవర్గంలో రైతుల సమస్యలను తెలుసుకుంటూ, గ్రామాల అభివృద్ధికి ఎమ్మెల్యే కృషి చేస్తున్నారని పేర్కొన్నారు. ఎమ్మెల్యేపై తప్పుడు ప్రచారం ఆపకపోతే తగిన రీతిలో సమాధానం చెబుతామని హెచ్చరించారు.

✍️ఎర్ర లింగం, మేజర్ న్యూస్, మంచాల