ఈవీఎం గోడౌన్‌ భద్రతపై ప్రత్యేక దృష్టి : కలెక్టర్‌ సి.నారాయణరెడ్డి
ఈవీఎం గోడౌన్‌ల భద్రత విషయంలో ఎలాంటి నిర్లక్ష్యానికి తావివ్వొద్దని జిల్లా కలెక్టర్‌ సి.నారాయణరెడ్డి అధికారులను ఆదేశించారు. రాజేంద్రనగర్‌లోని ఈవీఎం గోడౌన్‌ను మంగళవారం ఆయన తనిఖీ చేశారు. గోడౌన్‌లో భద్రపరిచిన బ్యాలెట్‌ యూనిట్లు (బీయూ), కంట్రోల్‌ యూనిట్లు (సీయూ), వీవీప్యాట్‌ యంత్రాలతో పాటు ఇతర ఎన్నికల సామగ్రిని పరిశీలించారు.
గోడౌన్‌కు ఏర్పాటు చేసిన సీల్స్‌, భద్రతా ఏర్పాట్లను తనిఖీ చేసిన కలెక్టర్‌.. ఎన్నికల సామగ్రి నిల్వ, నిర్వహణలో ఎన్నికల సంఘం నిబంధనలు, మార్గదర్శకాలను తప్పనిసరిగా పాటించాలని సూచించారు. సీసీటీవీ నిఘా, పోలీసు బందోబస్తును నిరంతరం పర్యవేక్షించాలని ఆదేశించారు.
గోడౌన్‌ పరిసరాల్లో భద్రతా ప్రమాణాలను పకడ్బందీగా అమలు చేయాలని, ఈవీఎంల భద్రత విషయంలో అప్రమత్తంగా ఉండాలని స్పష్టం చేశారు.
కలెక్టర్‌ వెంట రాజేంద్రనగర్‌ ఆర్డీవో శ్రీధర్‌, తహసీల్దార్‌, వేర్‌హౌస్‌ ఇన్‌చార్జి రాములు, ఎన్నికల విభాగం అధికారులు రవీంద్రగుప్తా, పోలీసు అధికారులు, సంబంధిత సిబ్బంది ఉన్నారు.
(రంగారెడ్డి - మేజర్ న్యూస్)
