అటవీ హక్కుల క్లెయిమ్‌లపై హైకోర్టు కీలక ఉత్తర్వులు - పిటిషనర్ల ప్రశాంతమైన స్వాధీనంలో జోక్యం చేసుకోవద్దని ఆదేశం..

 సూర్య, చింతలమానేపల్లి : కుమురం భీమ్ ఆసిఫాబాద్ జిల్లా చింతలమానేపల్లి మండలంలోని దిందా గ్రామం అటవీ ప్రాంతానికి సంబంధించి అటవీ హక్కుల క్లెయిమ్‌లపై తెలంగాణ హైకోర్టు కీలక ఉత్తర్వులు జారీ చేసింది. కంపార్ట్‌మెంట్ నంబర్లు 178, 179, 180 పరిధిలోని అటవీ భూములకు సంబంధించి దాఖలైన డబ్ల్యు పి నం. 31369 ఆఫ్  2026 కేసులో 2026 సెప్టెంబర్ 21న ఈ ఉత్తర్వులు వెలువడ్డాయి.పిటిషనర్లు దాఖలు చేసిన అటవీ హక్కుల క్లెయిమ్‌లపై సంబంధిత సమర్థ అధికారి చట్టప్రకారం నిర్ణయం తీసుకునే వరకు వారి ప్రశాంతమైన స్వాధీనంలో జోక్యం చేసుకోరాదని న్యాయస్థానం ఆదేశించింది. అలాగే, పిటిషనర్ల వాదనలు వినేందుకు అవకాశం కల్పించి, చట్టపరమైన ప్రక్రియను అనుసరించాలని స్పష్టం చేసింది.అయితే, ఈ ఉత్తర్వులను ఆసరాగా చేసుకుని రిజర్వ్ ఫారెస్ట్ పరిధిలో కొత్తగా ఆక్రమణలకు పాల్పడరాదని హైకోర్టు స్పష్టం చేసింది. అటువంటి ఆక్రమణలు జరిగినట్లయితే తెలంగాణ ఫారెస్ట్ యాక్ట్, 1967 ప్రకారం తగిన చర్యలు తీసుకునే అవకాశం ఉంటుందని పేర్కొంది.అటవీ హక్కుల చట్టం, 2006 నిబంధనలకు అనుగుణంగా సంబంధిత అధికారులు క్లెయిమ్‌లను పరిశీలించి, చట్టప్రకారం నిర్ణయం తీసుకోవాల్సి ఉంది. ఈ ఉత్తర్వులు అటవీ హక్కుల క్లెయిమ్‌ల పరిశీలనతో పాటు రిజర్వ్ ఫారెస్ట్‌లో కొత్త ఆక్రమణలకు సంబంధించిన అంశాలపై స్పష్టతనిస్తున్నాయి.