ఓటర్ల జాబితా ప్రత్యేక సవరణ (SIR) ప్రక్రియను నిలిపివేయాలి: తొలగించిన అర్హుల పేర్లను పునరుద్ధరించాలని కాంగ్రెస్ డిమాండ్!
సూర్య జాతీయ డెస్క్: ఓటర్ల జాబితా ప్రత్యేక ముమ్మర సవరణ (SIR) ప్రక్రియను ఎటువంటి షరతులు లేకుండా తక్షణమే నిలిపివేయాలని కాంగ్రెస్ పార్టీ ఎన్నికల సంఘాన్ని డిమాండ్ చేసింది. సవరణ పేరుతో వేలాది మంది అర్హులైన ఓటర్ల పేర్లను జాబితా నుంచి అన్యాయంగా తొలగించారని, ఆ ఓట్లను వెంటనే పునరుద్ధరించాలని పార్టీ డిమాండ్ చేసింది.
ఓటర్ల జాబితాలో పెద్ద ఎత్తున అవకతవకలు జరిగాయని, రాజకీయ ప్రయోజనాల కోసమే లక్షలాది మంది అర్హులైన ఓటర్ల హక్కులను కాలరాస్తున్నారని కాంగ్రెస్ నేతలు ఆరోపించారు. సరైన పరిశీలన, క్షేత్రస్థాయి విచారణ లేకుండా అర్హులైన పౌరుల పేర్లను తొలగించడం ప్రజాస్వామ్య స్ఫూర్తికి విరుద్ధమని పార్టీ స్పష్టం చేసింది.
సమగ్ర పరిశీలన జరిగి, అర్హులైన ప్రతీ ఓటరు పేరు జాబితాలో చేరేవరకు ప్రస్తుత సవరణ ప్రక్రియను పూర్తిగా నిలిపివేయాలని ఎన్నికల కమిషన్ను కోరారు. తొలగించిన ఓట్లను వెంటనే పరిశీలించి రికార్డుల్లో చేర్చకపోతే రాజ్యాంగబద్ధ హక్కుల పరిరక్షణ కోసం న్యాయపోరాటం చేస్తామని కాంగ్రెస్ హెచ్చరించింది.