అంధులను..అందరిని ఆదుకుంటున్న సదాశయ ఫౌండేషన్

సూర్య, సెంటినరీ కాలనీ  :అందులను, అందరిని ఆదుకుంటున్న వస్తుంది సదాశయ ఫౌండేషన్. నేత్ర, అవయవ, దేహదానాలపై అవగాహన కల్పిస్తూ మరణానంతరం కూడా ఇతరులకు జీవితాన్ని ప్రసాదించాలనే మహోన్నత ఆశయంతో సదాశయ ఫౌండేషన్ గత 18 సంవత్సరాలుగా విశేష సేవలందిస్తోంది. ఫౌండేషన్ 18వ వార్షికోత్సవాన్ని పురస్కరించుకుని నేడు ఓదెల లోని మల్లికార్జున ఫంక్షన్ హాల్ లో  వార్షికోత్సవ కార్యక్రమాన్ని నిర్వహించనున్నారు. 02అక్టోబర్2008 న మహాత్మా గాంధీ జయంతి సందర్భంగా పెద్దపల్లి జిల్లా 8వ కాలనీలో సదాశయ ఫౌండేషన్ ఆవిర్భవించింది. నేత్ర, అవయవ, దేహదానం ద్వారా మరణానంతరం కూడా సమాజానికి సేవ చేయాలనే సంకల్పంతో ఈ స్వచ్ఛంద సంస్థను స్థాపించారు. నేత్ర, దేహదానం చేసిన టి. అశోక్ కుమార్ స్ఫూర్తితో, కాళోజీ ఆశయాలను అనుసరిస్తూ సంస్థ తన సేవా కార్యక్రమాలను ప్రారంభించింది. అప్పట్లో ఆర్జీ-2 జీఎం రాజేందర్ రెడ్డి చేతుల మీదుగా 8వ కాలనీలోని సీఈఆర్ క్లబ్‌లో ఫౌండేషన్ ప్రారంభమైంది. నాటి నుంచి రెండు తెలుగు రాష్ట్రాల్లో నేత్ర, అవయవ, దేహదానాలపై విస్తృతంగా అవగాహన కల్పిస్తూ ఫౌండేషన్ ప్రతినిధులు నిరంతరం కృషి చేస్తున్నారు. వారి సేవల ఫలితంగా ఇప్పటివరకు 1,660 నేత్రదానాలు, 160 దేహదానాలు, 95 అవయవ దానాలు జరిగాయి. ఈ మహోన్నత కార్యక్రమాలకు సహకరించిన దాతలు, వారి కుటుంబ సభ్యులు, సంస్థ ప్రతినిధులను ఫౌండేషన్ అభినందిస్తోంది. అవయవ దేహ దానాలపై విశేష కృషి చేస్తున్నందుకు హైద్రాబాద్ రవీంద్రభారతిలో జీవన్ దాన్ సంస్థ ద్వారా హెల్త్ సెక్రటరీ సత్కారం పొందారు.

దుఃఖంలోనూ దానానికి ముందుకు వచ్చిన కుటుంబాలకు అభినందనలు:-

ఆత్మీయులను కోల్పోయిన తీవ్ర విషాదంలోనూ ఇతరులకు చూపునివ్వాలనే ఆశయంతో నేత్రదానం చేయడం, ప్రాణాలు నిలిపేందుకు అవయవ దానం చేయడం, వైద్య పరిశోధనలకు ఉపయోగపడేలా దేహదానం చేయడం ఎంతో గొప్ప త్యాగమని ఫౌండేషన్ ప్రతినిధులు పేర్కొన్నారు. అలాంటి కుటుంబాలకు సదాశయ ఫౌండేషన్ తరఫున పాదాభివందనాలు తెలియజేస్తూ, వారి మానవతా విలువలను కొనియాడారు. ప్రతి సంవత్సరం నిర్వహిస్తున్న సంప్రదాయాన్ని కొనసాగిస్తూ, ఈ ఏడాది కూడా నేత్ర, అవయవ, దేహదానాలు చేసిన కుటుంబ సభ్యులను వార్షికోత్సవ కార్యక్రమంలో ఘనంగా సత్కరించనున్నారు. వివిధ ప్రాంతాలకు చెందిన ఫౌండేషన్ ప్రతినిధులు, సేవా కార్యకర్తలు, దాతల కుటుంబ సభ్యులు పెద్ద సంఖ్యలో హాజరై కార్యక్రమాన్ని విజయవంతం చేయాలని నిర్వాహకులు కోరారు.


-జీవన్‌దాన్ సంస్థ ద్వారా గుర్తింపు:-

అవయవ, దేహదానాలపై విశేష కృషి చేస్తున్నందుకు హైదరాబాద్‌లోని రవీంద్రభారతిలో జీవన్‌దాన్ సంస్థ ఆధ్వర్యంలో నిర్వహించిన కార్యక్రమంలో ఫౌండేషన్ సేవలకు గుర్తింపు లభించింది. ఈ సందర్భంగా హెల్త్ సెక్రటరీ చేతుల మీదుగా సత్కారం అందుకోవడం సంస్థ సేవలకు లభించిన గౌరవంగా నిలిచింది. సదాశయ ఫౌండేషన్ జాతీయ ప్రధాన కార్యదర్శి చౌడవరపు లింగమూర్తి నేతృత్వంలో సంస్థ నేత్ర, అవయవ, దేహదానాలపై అవగాహన పెంపొందించడంతో పాటు వివిధ సామాజిక సేవా కార్యక్రమాలను కొనసాగిస్తోంది. మానవత్వం, సేవాభావం, దాతృత్వం అనే విలువలతో మరింత మందిని దాన కార్యక్రమాల వైపు ప్రోత్సహించడమే సంస్థ ప్రధాన లక్ష్యంగా ముందుకు సాగుతోంది.

 

సదాశయ ఫౌండేషన్‌ 18వ వార్షికోత్సవానికి ఏర్పాట్లు పూర్తి
-దాతల కుటుంబాలకు ఘన సన్మానం

-సదాశయ ఫౌండేషన్ జాతీయ ప్రధాన కార్యదర్శి చౌడవరపు లింగమూర్తి

సమాజ సేవే లక్ష్యంగా ముందుకు సాగుతున్న సదాశయ ఫౌండేషన్‌ 18వ వార్షికోత్సవ కార్యక్రమాన్ని ఆదివారం నిర్వహించనున్నట్లు సదాశయ ఫౌండేషన్ జాతీయ ప్రధాన కార్యదర్శి చౌడవరపు లింగమూర్తి తెలిపారు. ఈ సందర్భంగా నేత్రదానం, అవయవ దానం, దేహ దానం చేసిన దాతల కుటుంబాలను ఘనంగా సన్మానించనున్నారు. పెద్దపల్లి జిల్లా ఒదెలలోని మల్లికార్జున ఫంక్షన్‌ హాల్‌లో ఉదయం 10.00 గంటలకు కార్యక్రమం ప్రారంభం కానుంది. ఈ కార్యక్రమానికి పెద్దపల్లి ఎమ్మెల్యే, ప్రభుత్వ చీఫ్‌ విప్‌ చింతకుంట విజయరమణారావు ముఖ్య అతిథిగా, జిల్లా కలెక్టర్‌ కె. శ్రీహర్ష ప్రత్యేక అతిథిగా హాజరుకానున్నారు. పెద్దపల్లి ఏసీపీ జి. కృష్ణ, జిల్లా వైద్య ఆరోగ్యశాఖ అధికారి డాక్టర్‌ పవిత్ర, ఒదెల సర్పంచ్‌ కె. సతీష్‌, హైదరాబాద్‌ ఎల్వీ ప్రసాద్‌ ఐ ఇన్‌స్టిట్యూట్‌ మేనేజర్‌ టి. కిషన్‌రెడ్డి, వాసన్‌ ఐ బ్యాంక్‌ డిప్యూటీ జనరల్‌ మేనేజర్‌ ఎ. అరవింద్‌కుమార్‌, మోహన్‌ ఫౌండేషన్‌ సీనియర్‌ ట్రాన్స్‌ప్లాంట్‌ కోఆర్డినేటర్‌ డాక్టర్‌ భానుప్రకాష్‌ తదితరులు పాల్గొననున్నారు. అలాగే కమాన్‌పూర్‌ లయన్స్‌ క్లబ్‌ అధ్యక్షుడు సనా రామకృష్ణారెడ్డి, రామగుండం లయన్స్‌ క్లబ్‌ మాజీ జోన్‌ చైర్‌పర్సన్‌ పి. మల్లికార్జున్‌ హాజరుకానున్నారు. సదాశయ ఫౌండేషన్‌ చీఫ్‌ అడ్వైజర్‌ శ్రీ నూక రమేష్‌ ప్రత్యేక ఆహ్వానితుడిగా పాల్గొననున్నారు.

దాతల సేవలకు గుర్తింపు:-

నేత్రదానం, అవయవ దానం, దేహదానం ద్వారా ఇతరులకు ప్రాణదానం చేసిన మహనీయుల సేవలను గుర్తిస్తూ వారి కుటుంబాలను సన్మానించడం కార్యక్రమ ప్రధాన ఉద్దేశమని నిర్వాహకులు తెలిపారు. అవయవదానం ప్రాముఖ్యత పై ప్రజల్లో అవగాహన పెంపొందించడం, మరింతమంది దాతృత్వం వైపు అడుగులు వేసేలా ప్రోత్సహించడం ఈ కార్యక్రమం లక్ష్యమని పేర్కొన్నారు. సమాజంలో మానవతా విలువలను పెంపొందిస్తూ, ఆపదలో ఉన్నవారికి అండగా నిలుస్తున్న సదాశయ ఫౌండేషన్‌ సేవలను పలువురు అభినందిస్తున్నారు. కార్యక్రమానికి ప్రజలు, సేవా సంస్థల ప్రతినిధులు, దాతల కుటుంబ సభ్యులు పెద్ద సంఖ్యలో హాజరు కావాలని నిర్వాహకులు కోరారు.