రామాయణంలో రావణుడిగా యశ్.. ఆ అద్భుత రూపాల వెనుక ఉన్న సానియా సర్ధారియా విశేషాలు

సూర్య ఎంటర్‌టైన్‌మెంట్ డెస్క్: తెరపై రావణుడి పాత్రను యశ్ పోషించిన తీరుపై ఇప్పుడు దేశవ్యాప్తంగా విస్తృత చర్చ జరుగుతోంది. తపస్వి, యోధుడు, మహారాజు, ఋషి వంటి విభిన్న కోణాల్లో రావణుడి పాత్రను తీర్చిదిద్దిన విధానం ప్రేక్షకులను విశేషంగా ఆకట్టుకుంటోంది. ఈ విభిన్న రూపాలన్నింటి వెనుక ఉన్నది ప్రముఖ ఫ్యాషన్ ఆర్టిస్ట్, సెలబ్రిటీ కాస్ట్యూమ్ డిజైనర్ సానియా సర్ధారియా. గత పదకొండు సంవత్సరాలుగా యశ్‌తో కలిసి పనిచేస్తున్న ఆమె, అతని సినిమా పాత్రలకే కాకుండా ఇతర కార్యక్రమాల కోసం కూడా ప్రత్యేకమైన లుక్స్‌ను రూపొందిస్తూ వస్తున్నారు.

కేజీఎఫ్ చిత్రంలోని రాఖీభాయ్ లుక్‌తో పాటు టాక్సిక్ సినిమా కోసం కూడా విభిన్నమైన లుక్స్‌ను సిద్ధం చేసిన సానియా సర్ధారియా, ఇప్పుడు రామాయణం చిత్రంలో యశ్‌ను మరింత ప్రత్యేకంగా కనిపించేలా తీర్చిదిద్దారు. ఈ చిత్రం కోసం కాస్ట్యూమ్స్, ఆభరణాలు, హెయిర్‌స్టైల్ వంటి అంశాలను రూపొందించడం ఎంతో సవాలుతో కూడుకున్నదని ఆమె వివరించారు. గత చిత్రాలతో పోలిస్తే ఇది అత్యంత క్లిష్టమైన పాత్ర అని పేర్కొన్నారు.

రావణుడి పాత్ర రూపాన్ని తీర్చిదిద్దడానికి రావణుడిలోని విభిన్న వ్యక్తిత్వాలను ప్రాతిపదికగా తీసుకున్నట్లు సానియా తెలిపారు. వీరత్వం, శివభక్తి, అహం, ధైర్యం, జ్ఞానం, ఆశయం వంటి లక్షణాల ఆధారంగా దుస్తులు, రంగులు, ఆభరణాలను ఎంపిక చేసినట్లు వెల్లడించారు. ఆభరణాల్లో శివతత్వం, శ్రీలంక వాస్తుశిల్ప ఛాయలు కనిపించేలా జాగ్రత్తలు తీసుకున్నట్లు చెప్పారు.

ముఖ్యమైన సన్నివేశాల కోసం యశ్ ధరించిన దుస్తులు, ఆభరణాల బరువు దాదాపు ముప్పై మూడు కిలోల వరకు ఉండగా, కిరీటం బరువే ఒకటిన్నర కిలోలకు పైగా ఉన్నట్లు సమాచారం. ఇన్ని సవాళ్ల మధ్య కూడా యశ్ షూటింగ్ సెట్‌లో ఉత్సాహంగా ఉంటూ బృందాన్ని నవ్వించేవారని, కాస్ట్యూమ్ రూపకల్పనలోనూ తన వంతు సూచనలు ఇస్తూ సహకరించారని సానియా సర్ధారియా గుర్తు చేసుకున్నారు.

Also Read: గొర్రెల చోరీ నిందితుల అరెస్టు... రిమాండ్ కు తరలింపు.…