పోలింగ్ కేంద్రాలను పరిశీలించిన జిల్లా ఎస్పీ తుషార్ డూడి

చిత్తూరు ప్రతినిధి మేజర్ న్యూస్: జిల్లాలో నిర్వహిస్తున్న జెడ్పీటీసీ, ఎంపీటీసీ ఎన్నికల పోలింగ్ ప్రక్రియలో భాగంగా పలు కేంద్రాలను గురువారం జిల్లా ఎస్పీ తుషార్ డూడి , జిల్లా కలెక్టర్ సుమిత్ కుమార్ పోలింగ్ కేంద్రాలను పరిశీలించారు. పోలింగ్ సరళి, ఓటర్లకు కల్పించిన సౌకర్యాలు, పోలీసు భద్రతా ఏర్పాట్లను క్షేత్రస్థాయిలో పరిశీలించారు. ఎన్నికల విధుల్లో ఉన్న అధికారులు, పోలీసు సిబ్బందితో మాట్లాడి ఎన్నికల నిర్వహణపై వివరాలు తెలుసుకున్నారు. ఎన్నికల ప్రక్రియ ప్రశాంతంగా, పారదర్శకంగా, నిష్పక్షపాతంగా జరిగేలా పోలీసు ఎన్నికల సిబ్బంది సమన్వయంతో అప్రమత్తంగా విధులు నిర్వర్తించాలని అధికారులను ఆదేశించారు.జెడ్పీటీసీ, ఎంపీటీసీ ఎన్నికల నేపథ్యంలో జిల్లావ్యాప్తంగా పటిష్టమైన పోలీసు బందోబస్తు ఏర్పాటు చేశామని తెలిపారు. సమస్యాత్మక, అతి సమస్యాత్మక పోలింగ్ కేంద్రాలపై ప్రత్యేక నిఘా కొనసాగుతోందని, ఎలాంటి అవాంఛనీయ సంఘటనలు చోటుచేసుకోకుండా పోలీసు సిబ్బంది నిరంతరం అప్రమత్తంగా విధులు నిర్వర్తిస్తున్నారని పేర్కొన్నారు.ఓటర్లు ఎలాంటి భయాందోళనలు, ఒత్తిళ్లకు గురికాకుండా స్వేచ్ఛగా తమ ఓటు హక్కును వినియోగించుకోవాలని సూచించారు. పోలింగ్ కేంద్రాల వద్ద అనవసరంగా గుమిగూడరాదని, ఎన్నికల నియమావళిని ఉల్లంఘించే వారిపై, శాంతిభద్రతలకు విఘాతం కలిగించే వారిపై చట్టప్రకారం కఠిన చర్యలు తీసుకుంటామని హెచ్చరించారు. జిల్లా కలెక్టర్ సుమిత్ కుమార్ మాట్లాడుతూ జిల్లాలో జెడ్పీటీసీ, ఎంపీటీసీ ఎన్నికలను ఎన్నికల సంఘం మార్గదర్శకాలకు అనుగుణంగా పారదర్శకంగా, నిష్పక్షపాతంగా నిర్వహించేందుకు అన్ని ఏర్పాట్లు చేయడం జరిగిందని తెలిపారు. 

ఉమా శంకర్ చిత్తూరు స్టాఫ్ రిపోర్టర్.