నే'తలరాతలు' తేలేది నేడే..!

(విజయనగరం బ్యూరో, సూర్య)
ఎన్నికల బరిలో దిగినప్పుడు గెలుపుపై ధీమా వ్యక్తం చేయడం రాజకీయ పార్టీలకు సహజం. తమదే పైచేయి అని పైకి చెబుతూనే.. లోలోపల మాత్రం ఏ వార్డులో ఏం జరిగిందోనని లెక్కలు వేసుకోవడం మరో సహజ పరిణామం. ప్రచారంలో కనిపించిన ఉత్సాహం, పోలింగ్ రోజు నమోదైన ఓటింగ్ సరళి, తెరవెనుక సాగిన రాజకీయ సమీకరణాలు.. ఇవన్నీ ఇప్పుడు అభ్యర్థుల గుండెల్లో గుబులు పుట్టిస్తున్నాయి. ఓటరు తీర్పు ఈవీఎంలలో నిక్షిప్తమై ఉండటంతో ఎవరికి వారే గెలుపు అంచనాలు వేసుకుంటున్నారు. కానీ ఆ అంచనాలు ఎంతవరకు నిజమవుతాయో తేలడానికి మరికొన్ని గంటలే మిగిలి ఉన్నాయి. ఉమ్మడి విజయనగరం జిల్లాలోని విజయనగరం నగరపాలక సంస్థ, బొబ్బిలి మున్సిపాలిటీ, నెల్లిమర్ల నగర పంచాయతీ, సాలూరు, పార్వతీపురం మున్సిపాలిటీలు, పాలకొండ నగర పంచాయతీలకు ఈ నెల 1న పోలింగ్ ముగిసింది. నేటి ఉదయం నుంచి ఓట్ల లెక్కింపు ప్రారంభం కానుంది. ఆరు పట్టణ స్థానిక సంస్థల్లో ఎవరి జెండా ఎగురుతుందన్న దానిపై రాజకీయ వర్గాల్లో తీవ్ర ఉత్కంఠ నెలకొంది.
ఈ ఎన్నికల్లో కూటమి అభ్యర్థులకు కొన్ని ప్రాంతాల్లో సొంత పార్టీ నేతల నుంచే గట్టి సవాళ్లు ఎదురయ్యాయి. ముఖ్యంగా విజయనగరం కార్పొరేషన్ పరిధిలో రెబల్స్ ప్రభావం చర్చనీయాంశంగా మారింది. టికెట్లు ఆశించి భంగపడిన నేతలు, తమకు ప్రాధాన్యం దక్కలేదని అసంతృప్తితో ఉన్న నాయకులు, అధికారిక అభ్యర్థులకు సహకరించని వర్గాలు.. ఇలా అంతర్గతంగా అనేక సమీకరణాలు చోటుచేసుకున్నాయి. పార్టీ నిర్ణయాన్ని బహిరంగంగా సమర్థించిన కొందరు నేతలు క్షేత్రస్థాయిలో మాత్రం తమ అనుచరులను పూర్తిస్థాయిలో రంగంలోకి దించలేదన్న ప్రచారం ఉంది. మరికొన్ని చోట్ల స్వతంత్ర అభ్యర్థులుగా బరిలో నిలిచిన అసంతృప్తివాదులు అధికారిక అభ్యర్థుల విజయావకాశాలను ప్రభావితం చేసి ఉండొచ్చన్న అంచనాలు వినిపిస్తున్నాయి.
కూటమిలోని భాగస్వామ్య పార్టీల మధ్య సీట్ల సర్దుబాటు జరిగినా, స్థానికంగా నేతల మధ్య ఉన్న ఆధిపత్య పోరు పూర్తిగా సమసిపోలేదన్న అభిప్రాయాలు వ్యక్తమవుతున్నాయి. పైకి పార్టీ జెండాలు కలిసినా.. లోలోపల మనసులు కలిశాయా లేదా అన్నది ఇప్పుడు తేలనుంది. ఈ ఎన్నికల్లో మరో ఆసక్తికరమైన అంశం క్రాస్ ఓటింగ్. ఒక పార్టీకి చెందిన ఓటర్లు మరో పార్టీ అభ్యర్థికి ఓటు వేసి ఉంటారన్న అనుమానాలు కొన్ని ప్రాంతాల్లో వ్యక్తమవుతున్నాయి. ముఖ్యంగా స్థానికంగా వ్యక్తిగత సంబంధాలు, అభ్యర్థులపై ఉన్న అభిమానం, నాయకుల మధ్య విభేదాలు ఓటింగ్ సరళిని ప్రభావితం చేసి ఉండవచ్చని రాజకీయ పరిశీలకులు భావిస్తున్నారు. ఒకే పార్టీకి చెందిన అభ్యర్థులందరికీ ఒకే విధంగా ఓట్లు పడతాయని చెప్పలేని పరిస్థితి. ఒక వార్డులో పార్టీ అభ్యర్థికి ఆదరణ ఉన్నా, మరో వార్డులో అదే పార్టీ అభ్యర్థిపై వ్యతిరేకత ఉండవచ్చు. కొన్నిచోట్ల అభ్యర్థుల వ్యక్తిగత పరిచయాలు, సేవా కార్యక్రమాలు పార్టీ సమీకరణాలను మించి పనిచేసి ఉండవచ్చు. దీంతో ఏ వార్డులో ఏ పార్టీకి ఎంతమేర క్రాస్ ఓటింగ్ జరిగిందన్నది కౌంటింగ్ తర్వాతే స్పష్టమవుతుంది. కూటమిలో రెబల్స్ బెడద ఎక్కువగా చర్చకు వస్తుండగా, వైసీపీలోనూ కొన్ని ప్రాంతాల్లో అసంతృప్తి స్వరాలు వినిపించాయి. టికెట్ల కేటాయింపు, స్థానిక నాయకుల మధ్య ఆధిపత్య పోరు, అభ్యర్థుల ఎంపిక వంటి అంశాలు కొంతమేర ప్రభావం చూపినట్లు తెలుస్తోంది. అయితే కూటమితో పోలిస్తే వైసీపీలో రెబల్స్ ప్రభావం తక్కువ స్థాయిలోనే ఉందన్న అంచనాలు ఉన్నాయి. అయితే దీనిని వైసీపీకి పూర్తిస్థాయి అనుకూలతగా భావించలేం. గత ఎన్నికల ఫలితాల ప్రభావం, పార్టీ కేడర్‌లో నెలకొన్న పరిస్థితులు, స్థానికంగా నాయకుల బలాబలాలు కూడా ఫలితాలను ప్రభావితం చేసే అవకాశముంది. ఓటర్లు ఎవరికి పట్టం కట్టారన్నది తేలాల్సి ఉంది.
ఆరు పట్టణాల్లో ఆరు రకాల లెక్కలు!
విజయనగరంలో... కార్పొరేషన్ ఎన్నికలు జిల్లా రాజకీయాలకు ప్రతిష్ఠాత్మకంగా మారాయి. మేయర్ పీఠాన్ని దక్కించుకోవాలన్న లక్ష్యంతో ప్రధాన పార్టీలు వ్యూహాలు రచించాయి. అభ్యర్థుల వ్యక్తిగత బలం, స్థానిక నాయకుల పలుకుబడి, రెబల్స్ ప్రభావం ఇక్కడ కీలకంగా మారనున్నాయి. బొబ్బిలిలో... స్థానిక రాజకీయ సమీకరణాలు, ప్రధాన పార్టీల మధ్య పోటీ ఆసక్తికరంగా సాగింది. ఇక్కడ ఎవరు పైచేయి సాధిస్తారన్న దానిపై ప్రధాన పార్టీల్లో ఆసక్తి నెలకొంది. నెల్లిమర్లలో రాజకీయ పరిణామాలు ఈ ఎన్నికలకు మరింత ప్రాధాన్యం తీసుకొచ్చాయి. స్థానిక నాయకుల మధ్య మారిన సమీకరణాలు, పార్టీ మార్పులు, వ్యక్తిగత పలుకుబడి ఓటర్లపై ఎంతమేర ప్రభావం చూపాయన్నది ఆసక్తికరం. సాలూరులోనూ... ప్రధాన పార్టీల మధ్య పోటీపై ఉత్కంఠ నెలకొంది. పార్వతీపురంలో... పట్టణ రాజకీయాలతో పాటు స్థానిక నాయకుల ప్రభావం కీలకం కానుంది. పాలకొండలోనూ... అభ్యర్థుల వ్యక్తిగత బలం, పార్టీలకు ఉన్న పట్టుతో ఫలితాలు ముడిపడి ఉన్నాయి. ఆరు పట్టణాల్లోనూ ఒకే రకమైన రాజకీయ పరిస్థితులు లేవు. ఒక్కో ప్రాంతంలో ఒక్కో అంశం ఎన్నికల ఫలితాలను శాసించే అవకాశం కనిపిస్తోంది.

పోలింగ్ శాతం కూడా ఆసక్తికరమే!

నవంబర్ 1న జరిగిన పోలింగ్‌లో నెల్లిమర్ల అత్యధికంగా 80.31 శాతం ఓటింగ్ నమోదు చేసుకోవడం విశేషం. బొబ్బిలిలో 71.33 శాతం, విజయనగరం కార్పొరేషన్‌లో 62.73 శాతం, సాలూరులో 65.64 శాతం, పార్వతీపురంలో 63.63 శాతం, పాలకొండలో 69.64 శాతం పోలింగ్ నమోదైనట్లు గణాంకాలు చెబుతున్నాయి.
తేలనున్న రాజకీయ భవితవ్యం!
ప్రస్తుతం ఆరు పట్టణ స్థానిక సంస్థల్లోనూ ప్రధాన పార్టీల నేతలు తమదే విజయమంటూ ధీమా వ్యక్తం చేస్తున్నారు. వార్డుల వారీగా ఓట్ల లెక్కలు వేసుకుంటున్నారు. ఎక్కడెక్కడ తమకు ఆధిక్యం వస్తుందో అంచనాలు రూపొందించుకుంటున్నారు. అయితే పోలింగ్ అనంతరం అందుతున్న సమాచారం, క్షేత్రస్థాయి కార్యకర్తల అభిప్రాయాలు, రెబల్స్ ప్రభావంపై వస్తున్న నివేదికలు కొందరు నాయకుల్లో ఆందోళన పెంచుతున్నాయి.
ముఖ్యంగా కూటమిలో అంతర్గత అసంతృప్తి ఎంతమేర ప్రభావం చూపింది? రెబల్స్ ఎవరికి నష్టం కలిగించారు? క్రాస్ ఓటింగ్ ఏ పార్టీ అవకాశాలను దెబ్బతీసింది? వైసీపీ తన పట్టును ఎంతవరకు నిలబెట్టుకుంది? వంటి ప్రశ్నలకు నేడు సమాధానం లభించనుంది. అలాగే, రాజకీయాల్లో పైకి కనిపించేది ఒకటి.. తెరవెనుక జరిగేది మరొకటి. ఈ సంగతి అందరికీ తెలిసిందే. ఇప్పుడు ఓటరు తీర్పు వెలువడనుంది. గెలుపు ఎవరిని వరిస్తుంది? ఓటమి ఎవరికి గుణపాఠం నేర్పుతుంది? రెబల్స్ ఎవరికి చుక్కలు చూపిస్తారు? క్రాస్ ఓటింగ్ ఎవరికి షాక్ ఇస్తుంది? అన్నది మరికొన్ని గంటల్లో తేలిపోనుంది.