పీడీఎస్‌ సన్నబియ్యం అక్రమ నిల్వ.. - ఆరు క్వింటాళ్లు పట్టివేత

సూర్య - పెద్దపల్లి : ప్రజాపంపిణీ వ్యవస్థ (పీడీఎస్‌) ద్వారా పేదలకు సరఫరా చేసే సన్నబియ్యాన్ని అక్రమంగా నిల్వ ఉంచి, అధిక ధరలకు విక్రయిస్తున్న వ్యక్తిపై అధికారులు చర్యలు తీసుకున్నారు. పెద్దపల్లి పట్టణంలోని సాగర్‌ రోడ్డులో సోమవారం నిర్వహించిన తనిఖీల్లో ఆరు క్వింటాళ్ల పీడీఎస్‌ సన్నబియ్యాన్ని స్వాధీనం చేసుకున్నారు. జిల్లా పౌరసరఫరాల అధికారి కె. శ్రీనాథ్‌ ఆధ్వర్యంలో అధికారులు ఇంటి నంబర్‌ 3-3-136/A/1లో తనిఖీలు నిర్వహించారు. ఈ సందర్భంగా పీడీఎస్‌ సన్నబియ్యాన్ని ప్యాకింగ్‌ బ్యాగుల్లో నింపుతున్న బజ్జూరి శంకర్‌ను గుర్తించారు. 23 బ్యాగుల్లో ఉన్న మొత్తం ఆరు క్వింటాళ్ల బియ్యాన్ని స్వాధీనం చేసుకుని భద్రత నిమిత్తం ఎంఎల్‌ఎస్‌ పాయింట్‌కు తరలించారు.
పీడీఎస్‌ బియ్యాన్ని తక్కువ ధరకు కొనుగోలు చేసి అధిక ధరకు విక్రయిస్తున్నట్లు గుర్తించిన అధికారులు నిందితుడిపై 6-ఏ చట్టం కింద కేసుతో పాటు క్రిమినల్‌ కేసు నమోదు చేశారు. ఈ తనిఖీల్లో డీటీసీఎస్‌ పోచయ్య, సీఐ రాజిరెడ్డి, ఈటీఎఫ్‌ కానిస్టేబుల్‌ శ్రీనివాస్‌ పాల్గొన్నారు.