వరుస తుఫాన్ లతో రైతన్నకు కంటి మీద కునుకు కరువు

లక్కవరపుకోట, సూర్య : అకాల వర్షాలు అన్నదాతలను ఆందోళనకు గురిచేస్తున్నాయి. ఇప్పటికే పలు ప్రాంతాల్లో కురిసిన వర్షాలకు పంట పొలాలు నీట మునగగా, ఆ నీరు బయటకు వెళ్లకముందే మరోసారి తుఫాను ప్రభావంతో వర్షాలు కురుస్తుండటంతో రైతులు దిక్కుతోచని పరిస్థితిని ఎదుర్కొంటున్నారు. ఈ ఏడాది ఎల్‌నినో ప్రభావంతో వర్షాలు తక్కువగా పడతాయన్న అంచనాలతో అనేక మంది రైతులు పంటలు సాగు చేశారు. అయితే మధ్యమధ్యలో కురిసిన వర్షాలతో పంటల ఎదుగుదల ఆశాజనకంగా ఉండటంతో రైతుల్లో కొంత ఆశ చిగురించింది. కొన్ని ప్రాంతాల్లో పంటలకు కంకులు కూడా రావడంతో దిగుబడిపై ఆశలు పెరిగాయి. ఇంతలో వీచిన తుఫాను గాలులకు కొన్ని చోట్ల పంటలు నేలకొరిగి, పొలాల్లో నీరు చేరింది.
అన్ని కష్టాలను దాటుకుని తుఫాను ప్రభావం తగ్గిందని ఊపిరి పీల్చుకుంటున్న సమయంలో మళ్లీ ఉరుషు తుఫాను ప్రభావంతో మండలంలో వర్షాలు కురుస్తుండటంతో రైతుల ఆందోళన మరింత పెరిగింది. కాలువలు, చెరువులు పొంగిపొర్లుతుండటంతో పొలాల్లో నిలిచిన నీరు బయటకు వెళ్లే పరిస్థితి లేకుండా పోయింది. దీంతో పంటలు పూర్తిగా నీట మునిగి, తెగుళ్లు సోకే ప్రమాదం ఉందని రైతులు ఆవేదన వ్యక్తం చేస్తున్నారు.
ఇదే పరిస్థితి మరికొంతకాలం కొనసాగితే ఇప్పటివరకు బాగున్న పంటలు కూడా దెబ్బతిని తీవ్ర నష్టం వాటిల్లే ప్రమాదం ఉందని రైతులు భయపడుతున్నారు. వరుణుడి కరుణ కోసం కొన్నాళ్లు ఎదురుచూసిన రైతన్నలు, ఇప్పుడు అవసరానికి మించి కురుస్తున్న వర్షాలతో ఇబ్బందులు పడుతున్నారు. పంటలకు అవసరమైన మేరకే నీరు అందితే మంచి దిగుబడి వస్తుందని, వర్షపాతం ఎక్కువైనా, తక్కువైనా చివరకు నష్టపోయేది రైతన్నేనని ఆవేదన వ్యక్తం చేస్తున్నారు. ప్రపంచానికి ఆహారాన్ని అందించే అన్నదాతకు ప్రకృతి కూడా సహకరించాలని, రైతులు కష్టపడి పండించిన పంటలు చేతికొచ్చేలా వరుణుడు కరుణించాలని రైతులు కోరుకుంటున్నారు.