ఆపదలో ఉన్న రైతుకు అండగా నిలిచిన చైతన్య కిరణ్

బంట్వారం, మేజర్ న్యూస్: వ్యవసాయంలో ఎదురైన నష్టాలతో ఆత్మహత్యాయత్నానికి పాల్పడి ఆసుపత్రిలో చికిత్స పొందుతున్న రైతును బీఆర్ఎస్ నాయకుడు, అడ్వకేట్ మల్కాపురం చైతన్య కిరణ్ సోమవారం పరామర్శించారు. బంట్వారం మండల పరిధిలోని రొంపల్లి గ్రామానికి చెందిన రైతు, బీఆర్ఎస్ కార్యకర్త రాజు వారం రోజుల క్రితం పురుగుల మందు తాగి ఆత్మహత్యాయత్నానికి పాల్పడగా, ప్రస్తుతం వికారాబాద్‌లోని మిషన్ ఆసుపత్రిలో చికిత్స పొందుతున్నారు.విషయం తెలుసుకున్న చైతన్య కిరణ్ ఆసుపత్రికి వెళ్లి రాజు ఆరోగ్య పరిస్థితిని వైద్యులను అడిగి తెలుసుకున్నారు. మెరుగైన వైద్యం అందించాలని వైద్యులను కోరారు. అంతేకాకుండా ఆపదలో ఉన్న రైతు కుటుంబానికి తనవంతుగా ఆర్థిక సహాయం అందించి అండగా నిలిచారు.ఈ సందర్భంగా చైతన్య కిరణ్ మాట్లాడుతూ.. వ్యవసాయంలో నష్టాలు ఎదురైనప్పుడు రైతులు ధైర్యం కోల్పోకుండా కుటుంబ సభ్యులు, స్నేహితుల సహకారం తీసుకోవాలని సూచించారు. కష్టాల్లో ఉన్న రైతులకు అండగా నిలవడం ప్రతి ఒక్కరి బాధ్యతని పేర్కొన్నారు. రైతు కుటుంబాలకు భరోసా కల్పించేందుకు తనవంతు సహాయ సహకారాలు ఎల్లప్పుడూ అందిస్తానని తెలిపారు. రాజు త్వరగా కోలుకుని సంపూర్ణ ఆరోగ్యంతో ఇంటికి తిరిగి రావాలని ఆకాంక్షించారు.