నెల్లూరు, గూడూరులో కౌంటింగ్ కేంద్రాలను పరిశీలించిన జిల్లా కలెక్టర్ హిమాన్షు శుక్లా

నెల్లూరు, కార్పొరేషన్, మేజర్ న్యూస్ :  నెల్లూరు జిల్లాలో జెడ్పీటీసీ, ఎంపీటీసీ ఎన్నికల ఓట్ల లెక్కింపు ప్రక్రియ ప్రశాంత వాతావరణంలో కొనసాగుతోందని, రాత్రి 8 గంటల్లోగా పూర్తి ఫలితాలు వెల్లడయ్యే అవకాశం ఉందని జిల్లా కలెక్టర్ హిమాన్షు శుక్లా తెలిపారు. కౌంటింగ్ ప్రక్రియను అధికారులు కష్టపడి, సమన్వయంతో నిర్వహిస్తున్నారని పేర్కొన్నారు. ఎటువంటి అవాంఛనీయ సంఘటనలకు తావులేకుండా పటిష్టమైన ఏర్పాట్ల మధ్య ఓట్ల లెక్కింపు కొనసాగుతోందని తెలిపారు.  శనివారం నెల్లూరులోని వీఆర్ పీజీ కళాశాలలో ఏర్పాటు చేసిన జెడ్పీటీసీ, ఎంపీటీసీ ఎన్నికల కౌంటింగ్ కేంద్రాన్ని జిల్లా కలెక్టర్ హిమాన్షు శుక్లా, జాయింట్ కలెక్టర్ మొగిలి వెంకటేశ్వర్లు సందర్శించి ఓట్ల లెక్కింపు ప్రక్రియను పరిశీలించారు. కౌంటింగ్ నిర్వహణ, సిబ్బంది విధులు, ఫలితాల నమోదు తదితర అంశాలను పరిశీలించి అధికారులకు పలు సూచనలు చేశారు. కౌంటింగ్ ప్రక్రియలో ఎలాంటి పొరపాట్లకు తావులేకుండా ఎన్నికల నిబంధనలను పాటిస్తూ విధులు నిర్వహించాలని సూచించారు.  తొలుత గూడూరులోని ఎస్వీ ఆర్ట్స్ కళాశాలలో ఏర్పాటు చేసిన కౌంటింగ్ కేంద్రాన్ని కూడా కలెక్టర్ పరిశీలించారు. అక్కడ ఓట్ల లెక్కింపు తీరును సమీక్షించి రిటర్నింగ్ అధికారులకు పలు సూచనలు చేశారు. జిల్లాలోని ఆరు కౌంటింగ్ కేంద్రాల్లో ఓట్ల లెక్కింపు ప్రశాంతంగా కొనసాగుతోందని, అధికారులు సమర్థవంతంగా విధులు నిర్వహిస్తున్నారని తెలిపారు. కౌంటింగ్ కేంద్రాల వద్ద ఎటువంటి అవాంఛనీయ సంఘటనలు జరగకుండా పటిష్టమైన పోలీసు బందోబస్తు ఏర్పాటు చేసినట్లు పేర్కొన్నారు.
కలెక్టర్ పరిశీలనకు ముందుగా జిల్లా ఎన్నికల పరిశీలకురాలు సదా భార్గవి గూడూరులోని ఎస్వీ ఆర్ట్స్ కళాశాల కౌంటింగ్ కేంద్రాన్ని సందర్శించి, ఓట్ల లెక్కింపు ప్రక్రియను పరిశీలించారు. అధికారులకు పలు సూచనలు చేశారు.