ముందస్తు గుర్తింపే రొమ్ము క్యాన్సర్‌కు సరైన రక్ష: కిమ్స్ వైద్య నిపుణులు
నెల్లూరు కల్చరల్ మేజర్ న్యూస్ : మహిళల్లో రొమ్ము క్యాన్సర్‌పై విస్తృత అవగాహన పెంపొందించడం, ప్రాథమిక దశలోనే వ్యాధిని గుర్తించి ప్రాణాలను కాపాడటమే లక్ష్యంగా నెల్లూరులోని శ్రీ వెంకటేశ్వర కస్తూర్బా కళాక్షేత్రంలో కిమ్స్ హాస్పిటల్, కిమ్స్ కడల్స్ సంయుక్త ఆధ్వర్యంలో 'పింక్ అక్టోబర్' ముగింపు సందర్భంగా భారీ అవగాహన సదస్సును ఘనంగా నిర్వహించారు. ఈ సదస్సుకు నెల్లూరు పరిసర ప్రాంతాల నుంచి సుమారు 1,000 మందికి పైగా మహిళలు, విద్యార్థినులు ఉత్సాహంగా హాజరయ్యారు.
కార్యక్రమంలో కిమ్స్ వైద్య నిపుణులు ప్రసంగిస్తూ, రొమ్ము క్యాన్సర్‌ను ప్రారంభ దశలోనే గుర్తిస్తే అత్యాధునిక చికిత్సా విధానాల ద్వారా పూర్తిగా నయం చేయవచ్చని స్పష్టం చేశారు. మహిళలు తమ ఆరోగ్యం పట్ల ఏమాత్రం నిర్లక్ష్యం వహించరాదని, ప్రతి నెలా స్వీయ రొమ్ము పరీక్ష చేసుకోవడంతో పాటు క్రమం తప్పకుండా వైద్య పరీక్షలు చేయించుకోవాలని సూచించారు.
మహిళలను ఉత్తేజపరుస్తూ కేవలం వైద్యపరమైన అంశాలకే పరిమితం కాకుండా పలు సాంస్కృతిక, వినోదాత్మక కార్యక్రమాలను నిర్వహించారు. ఇందులో భాగంగా వీణ, సంగీత విభావరి, భరతనాట్యం, క్యాన్సర్ అవగాహనపై మైమ్ ప్రదర్శనలతో పాటు రొమ్ము ఆరోగ్యంపై నిర్వహించిన క్విజ్ పోటీలు ఆహూతులను విశేషంగా ఆకట్టుకున్నాయి.
ఈ అవగాహన కార్యక్రమాన్ని విజయవంతంగా నిర్వహించిన వైద్య బృందాన్ని, సిబ్బందిని కిమ్స్ గ్రూప్ ఆఫ్ హాస్పిటల్స్ చైర్మన్ అండ్ మేనేజింగ్ డైరెక్టర్ డాక్టర్ బొల్లినేని భాస్కర్ రావు, డైరెక్టర్ బొల్లినేని అద్విక్ ప్రత్యేకంగా అభినందించారు.ఈ కార్యక్రమంలో కిమ్స్ కడల్స్ యూనిట్ సి.ఓ.ఓ డాక్టర్ రోహిణి ప్రియ లక్ష్మి, రీజనల్ సి.ఓ.ఓ డాక్టర్ ప్రవీణ్ కుమార్ వంచితో పాటు కిమ్స్ వైద్య నిపుణులు, ఆసుపత్రి మహిళా సిబ్బంది పాల్గొన్నారు.
