మెదక్ జిల్లాలో మనోహరాబాద్ ఒక్కటే కరువు పీడిత మండలం

మెదక్, : మెదక్ జిల్లాలో మనోహరాబాద్ మండలం మాత్రమే కరువు పీడిత మండలంగా నమోదైనట్లు జిల్లా ముఖ్య ప్రణాళిక అధికారి సురేష్ స్పష్టం చేశారు. ఖరీఫ్ 2026 సీజన్‌కు సంబంధించి జూన్ 1 నుంచి సెప్టెంబర్ 30 వరకు నమోదైన వర్షాభావ పరిస్థితులపై రూపొందించిన మండలాల వారీ నివేదికను పరిశీలించిన అనంతరం ఈ వివరాలను వెల్లడించారు.కరువు పరిస్థితులను నిర్ధారించేందుకు రాష్ట్రస్థాయిలో ఏర్పాటు చేసిన కరువు పర్యవేక్షణ సెల్‌లు ఎప్పటికప్పుడు వర్షపాతం, పొడి కాలం తదితర సూచికలకు సంబంధించిన సమాచారాన్ని పరిశీలిస్తాయని తెలిపారు. కరువు నిర్ధారణలో వర్షపాత వ్యత్యాసం, నిర్దిష్ట వ్యవధిలో వర్షాలు లేకపోవడం (పొడి కాలం) కీలక సూచికలుగా పరిగణిస్తారని వివరించారు.సాధారణంగా నాలుగు వారాల పాటు కొనసాగిన పొడి కాలాన్ని కరువు నిర్ధారణకు పరిగణనలోకి తీసుకుంటారని, తేలికపాటి నేలల విషయంలో ఈ వ్యవధి మూడు వారాలుగా ఉంటుందని పేర్కొన్నారు.

21 మండలాల నివేదికలో కీలక వివరాలు

ఖరీఫ్ 2026 సీజన్‌కు సంబంధించి జూన్ 1 నుంచి సెప్టెంబర్ 30 వరకు జిల్లాలోని మొత్తం 21 మండలాల పొడి కాలం నివేదికను పరిశీలించగా.. మనోహరాబాద్ మండలంలో ఒక పొడి కాలం నమోదైనట్లు తెలిపారు. మిగిలిన 20 మండలాల్లో ఎలాంటి పొడి కాలాలు నమోదు కాలేదని వెల్లడించారు.ఈ నివేదికలోని మొత్తం కరువు కాలాల వివరాల ఆధారంగా మనోహరాబాద్ మండలాన్ని కరువు పీడిత మండలంగా సంబంధిత అధికార యంత్రాంగం ప్రకటించినట్లు జిల్లా ముఖ్య ప్రణాళిక అధికారి సురేష్ శనివారం ఒక ప్రకటనలో పేర్కొన్నారు.జిల్లాలోని మిగతా మండలాల్లో నివేదిత కాలానికి సంబంధించి పొడి కాలం నమోదు కాలేదని ఆయన స్పష్టం చేశారు.