-పదవీ విరమణ సందర్భంగా ఎస్పీ పరితోష్ పంకజ్, అదనపు ఎస్పీ చైతన్య రెడ్డి ఘన సన్మానం

పటాన్‌చెరు;ప్రజల రక్షణే పరమావధిగా భావించి శాంతిభద్రతల పరిరక్షణ కోసం అహర్నిశలు కృషి చేసిన ట్రాఫిక్ ఎస్ఐ నాగేశ్వరరావు సేవలు అభినందనీయమని జిల్లా ఎస్పీ పరితోష్ పంకజ్ అన్నారు. సుదీర్ఘకాలం పోలీసు శాఖలో సేవలందించి పదవీ విరమణ పొందడం సంతోషకరమని పేర్కొన్నారు. శనివారం ఇస్నాపూర్ ట్రాఫిక్ ఎస్ఐ నాగేశ్వరరావు పదవీ విరమణ సందర్భంగా సంగారెడ్డిలోని ఎస్పీ కార్యాలయంలో జిల్లా ఎస్పీ పరితోష్ పంకజ్, అదనపు ఎస్పీ చైతన్య రెడ్డి ఆయనను ఘనంగా సన్మానించారు.ఈ సందర్భంగా ఎస్పీ మాట్లాడుతూ పోలీసు ఉద్యోగం కేవలం వృత్తి మాత్రమే కాదని, అది సమాజం పట్ల బాధ్యత, కర్తవ్యం, అంకితభావానికి ప్రతీక అని అన్నారు. ఎండనక, వాననక, పండుగలు, సెలవులు లెక్కచేయకుండా ప్రజల భద్రత కోసం పోలీసులు నిరంతరం విధులు నిర్వహిస్తారని తెలిపారు. విధి నిర్వహణలో ఎన్నో సవాళ్లను ఎదుర్కొంటూ క్రమశిక్షణతో, న్యాయానికి నిబద్ధులై నాగేశ్వరరావు ప్రజలకు సేవలందించారని కొనియాడారు. తన అనుభవంతో సహచరులకు మార్గదర్శకంగా నిలిచి పోలీసు శాఖ గౌరవాన్ని పెంచారని పేర్కొన్నారు.ఒక అధికారి పదవీ విరమణ పొందవచ్చని, కానీ ఆయన అందించిన సేవలు, చేసిన మంచి పనులు, సంపాదించుకున్న గౌరవం ఎప్పటికీ పదవీ విరమణ పొందవని ఎస్పీ అన్నారు. పదవీ విరమణ అనంతరం నాగేశ్వరరావు ఆయురారోగ్యాలతో, సుఖసంతోషాలతో జీవించాలని ఆకాంక్షించారు.కార్యక్రమంలో పలువురు పోలీసు అధికారులు, సిబ్బంది పాల్గొన్నారు.