తొలి ఆరేళ్లే పిల్లల భవిష్యత్తుకు పునాది మెదడు అభివృద్ధిపై తల్లిదండ్రులు ప్రత్యేక శ్రద్ధ చూపాలి

                                        ఖరీదైన బొమ్మల కంటే ప్రేమ, మాటలు, ఆటలే ముఖ్యం: రాధిక ఎన్. ఆచార్య

హైదరాబాద్, మేజర్ న్యూస్ ప్రతినిధి : పిల్లల మెదడు అభివృద్ధిలో తొలి ఆరేళ్లు అత్యంత కీలకమని మెడికవర్ ఉమెన్ అండ్ చైల్డ్ హాస్పిటల్స్ కన్సల్టెంట్ క్లినికల్ సైకాలజిస్ట్, చైల్డ్ డెవలప్‌మెంట్ స్పెషలిస్ట్ రాధిక ఎన్. ఆచార్య తెలిపారు. ఐదేళ్ల వయస్సుకే మెదడు వయోజనుల మెదడు పరిమాణంలో 90 శాతానికి చేరుకుంటుందని, ఈ దశలో ప్రతి సెకనుకు పది లక్షలకు పైగా నాడీ సంబంధాలు ఏర్పడతాయని వివరించారు.
పుట్టినప్పటి నుంచి మూడేళ్ల వరకు భాష, ఇంద్రియ జ్ఞానం, భావోద్వేగ అనుబంధాలు వేగంగా అభివృద్ధి చెందుతాయని, మూడు నుంచి ఆరేళ్ల మధ్య జ్ఞాపకశక్తి, ఏకాగ్రత, సమస్యల పరిష్కార సామర్థ్యాలు మెరుగుపడతాయని పేర్కొన్నారు. పిల్లల ఎదుగుదలకు ఖరీదైన బొమ్మల కంటే తల్లిదండ్రుల ప్రేమ, సమయం, శ్రద్ధ ఎంతో అవసరమన్నారు. పిల్లలతో మాట్లాడటం, కథలు చెప్పడం, పుస్తకాలు చదివించడం, కలిసి ఆటలు ఆడటం వంటి అలవాట్లు మెదడు అభివృద్ధికి దోహదపడతాయని తెలిపారు. స్క్రీన్ వినియోగాన్ని తగ్గించి సృజనాత్మక ఆటలను ప్రోత్సహించాలని సూచించారు. ప్రేమ, భద్రత, ప్రోత్సాహం లభించే కుటుంబ వాతావరణం పిల్లల మానసిక, భావోద్వేగ ఎదుగుదలకు బలమైన పునాది వేస్తుందని రాధిక ఆచార్య పేర్కొన్నారు.