దేశ ఐక్యత, సమగ్రత, భద్రత పరిరక్షణకు ప్రతి ఒక్కరూ కృషి చేయాలి

మెదక్, : దేశ ఐక్యత, సమగ్రత, భద్రత పరిరక్షణకు ప్రతి ఒక్కరూ అంకితభావంతో కృషి చేయాలని అదనపు కలెక్టర్ నగేష్ పిలుపునిచ్చారు. భారతదేశ ఐక్యత కోసం ఉక్కు సంకల్పంతో పనిచేసిన సర్దార్ వల్లభాయ్ పటేల్ ఆశయాలు, స్ఫూర్తిని ప్రతి ఒక్కరూ ఆదర్శంగా తీసుకోవాలని సూచించారు.సర్దార్ వల్లభాయ్ పటేల్ జయంతి, జాతీయ ఐక్యత దినోత్సవాన్ని పురస్కరించుకుని శనివారం మెదక్ జిల్లా కలెక్టరేట్ కాన్ఫరెన్స్ హాలులో ప్రత్యేక కార్యక్రమం నిర్వహించారు. ఈ కార్యక్రమానికి అదనపు కలెక్టర్ నగేష్ హాజరై సర్దార్ వల్లభాయ్ పటేల్ చిత్రపటానికి పూలమాల వేసి ఘనంగా నివాళులర్పించారు.ఈ సందర్భంగా ఆయన మాట్లాడుతూ.. స్వాతంత్ర్యం అనంతరం దేశంలోని సంస్థానాలను ఏకతాటిపైకి తీసుకువచ్చి భారతదేశ సమైక్యతకు సర్దార్ వల్లభాయ్ పటేల్ చేసిన కృషి, సేవలు చిరస్మరణీయమని కొనియాడారు. దేశ సమగ్రతను కాపాడటంలో ఆయన పోషించిన పాత్ర చరిత్రలో ప్రత్యేక స్థానాన్ని సంపాదించుకుందని పేర్కొన్నారు.జాతీయ ఐక్యత దినోత్సవం సందర్భంగా ప్రతి ఒక్కరూ దేశ సమైక్యత, సోదరభావం, జాతీయ సమగ్రతను కాపాడేందుకు తమ వంతు బాధ్యతను నిర్వర్తించాలని పిలుపునిచ్చారు.ఈ కార్యక్రమంలో యువజన, క్రీడల శాఖ అధికారి రమేష్, ఏఓ యూనస్, వివిధ శాఖల అధికారులు, కలెక్టరేట్ సిబ్బంది తదితరులు పాల్గొన్నారు.