మంత్రి పయ్యావుల కేశవ్ ను కలసిన జడ్పిటిసి శ్రీరాములు.
.బ్రహ్మసముద్రం మండల అభివృద్ధికి అవసరమైన నిధుల మంజూరు, ప్రజా సమస్యల పరిష్కారమే లక్ష్యంగా జడ్పీటీసీ పాలబండ్ల శ్రీరాములు రాష్ట్ర ఆర్థిక శాఖ మంత్రి పయ్యావుల కేశవ్ను మర్యాదపూర్వకంగా కలిశారు. కళ్యాణదుర్గం నియోజకవర్గ శాసనసభ్యుడు అమిలినేని సురేంద్రబాబు సూచనల మేరకు గురువారం మంత్రి పయ్యావుల కేశవ్ను కలిసి పుష్పగుచ్ఛం అందజేసి శుభాకాంక్షలు తెలిపారు. ఈ సందర్భంగా బ్రహ్మసముద్రం మండలంలోని ప్రస్తుత పరిస్థితులు, అభివృద్ధికి అవసరమైన ప్రాధాన్యతా అంశాలు, ప్రజలు ఎదుర్కొంటున్న సమస్యలను మంత్రి దృష్టికి తీసుకెళ్లారు. మండలంలో మౌలిక సదుపాయాల అభివృద్ధి, గ్రామీణ ప్రాంతాల్లో ప్రజలకు అవసరమైన సౌకర్యాల కల్పన, వివిధ అభివృద్ధి పనులకు నిధుల మంజూరు వంటి అంశాలపై మంత్రితో చర్చించారు. మండలంలోని గ్రామాల సమగ్ర అభివృద్ధికి ప్రభుత్వం నుంచి అవసరమైన సహకారం అందించాలని, ప్రజలకు ఉపయోగపడే అభివృద్ధి కార్యక్రమాలకు ప్రాధాన్యత కల్పించాలని జడ్పీటీసీ శ్రీరాములు మంత్రిని కోరారు. ప్రజాప్రతినిధిగా మండల ప్రజల అవసరాలను ప్రభుత్వం దృష్టికి తీసుకెళ్లి అభివృద్ధి కార్యక్రమాల అమలుకు కృషి చేస్తానని తెలిపారు. జడ్పీటీసీ శ్రీరాములు ప్రస్తావించిన అంశాలపై మంత్రి పయ్యావుల కేశవ్ సానుకూలంగా స్పందించినట్లు సమాచారం. బ్రహ్మసముద్రం మండల అభివృద్ధికి తన వంతు పూర్తి సహకారం అందిస్తామని హామీ ఇచ్చినట్లు తెలిపారు. ఎమ్మెల్యే అమిలినేని సురేంద్రబాబు మార్గదర్శకత్వంలో మండల అభివృద్ధికి అవసరమైన చర్యలు చేపట్టేందుకు కృషి చేస్తామని శ్రీరాములు పేర్కొన్నారు. ప్రజల సమస్యలను సంబంధిత శాఖల దృష్టికి తీసుకెళ్లి పరిష్కారానికి కృషి చేయడంతో పాటు, ప్రభుత్వ సహకారంతో మండలాన్ని అభివృద్ధి పథంలో ముందుకు తీసుకెళ్లడమే తన లక్ష్యమని తెలిపారు.