ప్రభుత్వ పాఠశాలలు, అంగన్వాడీలకు గుడ్ల సరఫరా ధరలపై కలెక్టర్ సమీక్ష
వికారాబాద్ జిల్లా ప్రతినిధి, మేజర్ న్యూస్: జిల్లాలోని ప్రభుత్వ పాఠశాలలు, అంగన్వాడీ కేంద్రాలకు సరఫరా చేసే గుడ్ల ధరల నిర్ణయంపై జిల్లా కలెక్టర్ టెండర్దారులతో సమావేశం నిర్వహించారు. గురువారం కలెక్టరేట్లోని వీడియో కాన్ఫరెన్స్ హాలులో సంక్షేమ శాఖ అధికారులతో కలిసి నిర్వహించిన ఈ సమావేశంలో గుడ్ల ప్రస్తుత మార్కెట్ ధరలు, కొనుగోలు ధరలు, రవాణా ఖర్చులు, సరఫరా వ్యయం తదితర అంశాలపై చర్చించారు. ప్రభుత్వ నిబంధనలకు అనుగుణంగా పారదర్శకంగా ధరలు నిర్ణయించే అంశంపై టెండర్దారుల అభిప్రాయాలను కలెక్టర్ అడిగి తెలుసుకున్నారు. విద్యార్థులు, చిన్నారులకు అందించే పోషకాహార పథకాల అమలులో ఎలాంటి అంతరాయం కలగకుండా నాణ్యమైన గుడ్లను నిర్ణీత సమయంలో సరఫరా చేయాలని సూచించారు. గుడ్ల ధరల నిర్ణయంలో పారదర్శకత పాటించాలని, ప్రభుత్వంపై అదనపు ఆర్థిక భారం పడకుండా చూడాలని, సరఫరాదారులు నిబంధనలకు అనుగుణంగా వ్యవహరించాలని స్పష్టం చేశారు. గుడ్ల ధరలు, సరఫరా విషయంలో ఎలాంటి అవకతవకలకు తావులేకుండా సంబంధిత అధికారులు నిరంతరం పర్యవేక్షించాలని ఆదేశించారు. ఈ సమావేశంలో అదనపు కలెక్టర్ ఉమాశంకర్ ప్రసాద్, ఎం.జె.ఆర్. పౌల్ట్రీ, గీత పౌల్ట్రీ ప్రతినిధులు, జిల్లా అధికారులు తదితరులు పాల్గొన్నారు.