telangana
జాతీయ గ్రంథాలయ వారోత్సవాల్లో పాల్గొన్న మున్సిపల్ చైర్పర్సన్ బండారి అనూష సతీష్
సూర్య ఆదిలాబాద్ ప్రతినిధి : జిల్లా కేంద్ర గ్రంథాలయంలో జిల్లా గ్రంథాలయ సంస్థ ఆధ్వర్యంలో నిర్వహిస్తున్న 59వ జాతీయ గ్రంథాలయ వారోత్సవాల కార్యక్రమంలో మున్సిపల్ చైర్పర్సన్ బండారి అనూష సతీష్ ముఖ్య అతిథిగా పాల్గొన్నారు. ఈ సందర్భంగా ఆమె మాట్లాడుతూ గ్రంథాలయాలు విజ్ఞాన భాండాగారాలని, విద్యార్థులు, యువతలో పఠనాసక్తిని పెంపొందించడంలో గ్రంథాలయాలు కీలక పాత్ర పోషిస్తాయని అన్నారు. పుస్తక పఠనం ద్వారా జ్ఞానం, ఆలోచనా శక్తి, వ్యక్తిత్వ వికాసం పెంపొందుతాయని తెలిపారు. నేటి ఆధునిక డిజిటల్ యుగంలో కూడా పుస్తక పఠనానికి ఎంతో ప్రాధాన్యత ఉందని, విద్యార్థులు ప్రతిరోజూ కొంత సమయాన్ని పుస్తక పఠనానికి కేటాయించాలని సూచించారు. జాతీయ గ్రంథాలయ వారోత్సవాలను పురస్కరించుకొని వివిధ పాఠశాలలకు చెందిన విద్యార్థినులతో గ్రంథాలయ ప్రాంగణంలో నిర్వహించిన రంగుల పోటీ (ముగ్గుల) పోటీలను ఆమె అభినందించారు. ఇలాంటి సృజనాత్మక కార్యక్రమాలు విద్యార్థుల్లో దాగి ఉన్న ప్రతిభను వెలికితీయడంతో పాటు కళాత్మక ఆలోచనలు, సృజనాత్మకతను పెంపొందిస్తాయని పేర్కొన్నారు. చదువుతో పాటు సాంస్కృతిక, కళా రంగాల్లోనూ విద్యార్థులు రాణించాలని ఆకాంక్షించారు. విద్యార్థుల్లో పుస్తక పఠనంపై ఆసక్తిని పెంచేందుకు, వారి ప్రతిభను ప్రోత్సహించేందుకు గ్రంథాలయ సంస్థ చేపడుతున్న కార్యక్రమాలు అభినందనీయమని అన్నారు.ఈ కార్యక్రమంలో జిల్లా గ్రంథాలయ సంస్థ చైర్మన్ మల్లెపూల నరసయ్య సుజాత మేడం, అన్నపూర్ణ , గ్రంథాలయ కార్యదర్శి సురేష్ బాబు గ్రంథాలయ అధికారులు, సిబ్బంది, వివిధ పాఠశాలల ఉపాధ్యాయులు, విద్యార్థినులు తదితరులు పాల్గొన్నారు.