ఏపీఎన్జీవోస్ ఆధ్వర్యంలో 504 మంది మహిళా ఉద్యోగులకు ఉచిత వైద్య పరీక్షలు
గుంటూరు : ఏపీఎన్జీజీవోస్ అసోసియేషన్ గుంటూరు జిల్లా శాఖ ఆధ్వర్యంలో మహిళా ఉద్యోగుల కోసం నాలుగు రోజుల పాటు నిర్వహించిన ఉచిత క్యాన్సర్ స్క్రీనింగ్ మెగా వైద్య శిబిరం గురువారం విజయ వంతంగా ముగిసింది. ఈ నెల 16 నుండి 19వ తేదీ వరకు గుంటూరు జీజీహెచ్లోని నాట్కో క్యాన్సర్ సెంటర్ ప్రాంగణంలో నిర్వహించిన ఈ శిబిరంలో 30 నుండి 65 ఏళ్ల వయసు గల 504 మంది మహిళా ఉద్యోగులకు గర్భాశయ ముఖద్వార (సెర్వికల్), రొమ్ము క్యాన్సర్ నిర్ధారణ పరీక్షలు నిర్వహించారు. వీరిలో 45 మందికి వ్యాధి లక్షణాలు (పాజిటివ్) ఉన్నట్లు ప్రాథమిక దశలోనే గుర్తించి, తక్షణ వైద్య సేవలతో పాటు తగు సూచనలు అందజేశారు. అమెరికాకు చెందిన 'పింక్ ఆర్గనైజేషన్' వైద్య నిపుణులు డాక్టర్ సమత కడియాల, డాక్టర్ కరూర్ హబాక్, డాక్టర్ మెరిస్సా మిస్ కాల్ బృందం ఈ పరీక్షలు నిర్వహించగా, వారి సేవలను గుర్తించి సంఘం తరఫున ఘనంగా సన్మానించారు. అలాగే సహకరించిన ప్రివెంటివ్ ఆంకాలజీ జిల్లా కోఆర్డినేటర్ డాక్టర్ మొహసీనా, రాష్ట్ర కోఆర్డినేటర్ డాక్టర్ అనిల్ కుమార్లకు సంఘం నాయకులు కృతజ్ఞతలు తెలిపారు. శిబిరం విజయవంతం కావడంలో కీలక పాత్ర పోషించిన తాజున్నిసా ఆధ్వర్యంలోని మహిళా నాయకులను ఏపీఎన్జీవోస్ జిల్లా అధ్యక్షులు ఘంటసాల శ్రీనివాసరావు, కార్యదర్శి ఆరాధ్యుల శ్యామ్ సుందర్ శ్రీనివాస్, రాష్ట్ర ఉపాధ్యక్షులు షేక్ నాగూర్ షరీఫ్, నగర అధ్యక్షుడు చింతల కళ్యాణ్ కుమార్, నగర కార్యదర్శి జె.వి. కోటేశ్వరరావు అభినందించారు. ఉద్యోగులు, వారి కుటుంబాల ఆరోగ్య పరిరక్షణకు భవిష్యత్తులోనూ మరిన్ని సేవా కార్యక్రమాలు నిర్వహిస్తామని వారు పేర్కొన్నారు.
సూర్య నాయక్