కౌంటింగ్ కేంద్రంలో పకడ్బందీ ఏర్పాట్లు చేయాలి జిల్లా కలెక్టర్ ఎస్. రాంసుందర్ రెడ్డి

గరివిడి, అక్టోబర్ 24, మేజర్ న్యూస్:

జడ్పీటీసీ, ఎంపీటీసీ ఎన్నికల నేపథ్యంలో గరివిడి మండలంలోని ఎస్‌డీఎస్ కళాశాలలో ఏర్పాటు చేస్తున్న రిసెప్షన్ కేంద్రం, స్ట్రాంగ్ రూమ్, కౌంటింగ్ గదులను జిల్లా కలెక్టర్ ఎస్. రాంసుందర్ రెడ్డి శనివారం పరిశీలించారు.

ఈ కేంద్రంలో మెరకముడిదాం, గుర్ల, చీపురుపల్లి, గరివిడి మండలాలకు సంబంధించిన జడ్పీటీసీ, ఎంపీటీసీ ఎన్నికల పోలింగ్ మెటీరియల్ రిసెప్షన్, స్ట్రాంగ్ రూమ్, ఓట్ల లెక్కింపు ప్రక్రియ నిర్వహించనున్న నేపథ్యంలో ఏర్పాట్లను సమీక్షించారు.

ఈ సందర్భంగా కలెక్టర్ మాట్లాడుతూ కౌంటింగ్ నిర్వహణకు అవసరమైన గదులను కేటాయించి, రిసెప్షన్ కేంద్రం, స్ట్రాంగ్ రూమ్, కౌంటింగ్ గదుల్లో అన్ని ఏర్పాట్లు పకడ్బందీగా చేపట్టాలని అధికారులను ఆదేశించారు. ప్రవేశ, నిష్క్రమణ మార్గాలను స్పష్టంగా ఏర్పాటు చేయాలని, వాహనాల పార్కింగ్‌కు తగిన స్థలం కేటాయించాలని, విధుల్లో పాల్గొనే సిబ్బందికి భోజన, ఇతర మౌలిక సదుపాయాలు కల్పించాలని సూచించారు.

స్ట్రాంగ్ రూమ్‌ల వద్ద పటిష్టమైన భద్రతా ఏర్పాట్లు చేపట్టాలని, నిరంతర పర్యవేక్షణకు సీసీటీవీ కెమెరాలను ఏర్పాటు చేసి వాటి పనితీరును ఎప్పటికప్పుడు పరిశీలించాలని తెలిపారు. అనుమతి ఉన్న వ్యక్తులకే నిర్దేశిత ప్రాంతాల్లోకి ప్రవేశం కల్పించాలని, ఎన్నికల సామగ్రి భద్రతకు తగిన చర్యలు తీసుకోవాలని స్పష్టం చేశారు.

కౌంటింగ్ ప్రక్రియలో ఎలాంటి అపోహలకు, పొరపాట్లకు తావులేకుండా, ఎన్నికల నిబంధనలను ఖచ్చితంగా పాటిస్తూ పూర్తి పారదర్శకతతో ఓట్ల లెక్కింపు నిర్వహించేలా చర్యలు తీసుకోవాలని కలెక్టర్ ఆదేశించారు.

ఈ కార్యక్రమంలో చీపురుపల్లి ఆర్డీవో సుధారాణి, చీపురుపల్లి, గరివిడి తహసీల్దార్లు సంతోష్ కుమార్, బంగారు రాజు తదితరులు పాల్గొన్నారు.

శ్రీనివాస్ బ్యూరో, విజయనగరం