బిగ్‌బాస్ హౌస్‌లో రసవత్తరంగా మారిన ఆట.. ప్రత్యర్థులుగా పోటీపడి చివరకు సేవ్ అయిన త్రిగుణ్
సూర్య ఎంటర్‌టైన్‌మెంట్ డెస్క్: బిగ్‌బాస్ హౌస్‌లో రోజురోజుకు ఆట మరింత రసవత్తరంగా మారుతోంది. గ్రీన్ జోన్‌లో తన ఫొటో చూసుకుని దేబ్జానీ ఎమోషనల్ కాగా, చివరికి తన కష్టానికి తగిన ప్రతిఫలం దక్కిందని కన్నీళ్లు పెట్టుకుంది. ఈ క్రమంలో ఆమెతో పాటు అమన్, నీతూ గ్రీన్‌లో ఉండటంపై త్రిగుణ్ హర్షం వ్యక్తం చేశారు. ఇక ఎల్లో లెవల్‌లో ఉన్న పోటీదారుల కోసం బిగ్‌బాస్ ప్రత్యేకంగా గోట్ ఆఫ్ కామన్ సెన్స్ టాస్క్‌ను ప్రకటించారు. స్క్రీన్‌పై వచ్చే ప్రశ్నలకు ముందుగా స్పందించి బెల్ మోగించిన వారు ఎక్కువ పాయింట్లు సాధించవచ్చని సూచించారు. ఈ గేమ్‌లో మొదటి నుంచి రచ్చ చేసిన ముకేశ్ తప్పుడు సమాధానాలు చెప్పినప్పటికీ, చివరికి ఎక్కువ పాయింట్లు సాధించి గోట్ ఆఫ్ కామన్ సెన్స్‌గా నిలిచారు. దీని ద్వారా ఆయన ఎల్లో లెవల్ నుంచి నేరుగా గ్రీన్ లెవల్‌కు చేరుకోవడంతో పాటు రెండు వారాల పాటు ఎలిమినేషన్ గండం నుంచి పూర్తిగా సేవ్ అయ్యారు.
ఆ తర్వాత ఎల్లో లెవల్‌లోని మిగిలిన సభ్యులను గ్రీన్ లెవల్‌లోకి పంపేందుకు బిగ్‌బాస్ గోట్ ఆఫ్ స్పీడ్ టాస్క్‌ను నిర్వహించారు. ఈ గేమ్‌లో రాంప్రసాద్, నరేశ్, త్రిగుణ్, శివ్, వర్షిణి పాల్గొనగా, వర్షిణిని ఆడించడానికి ముకేశ్ చేసిన ప్రయత్నాలు ఫలించలేదు. చివరికి రాంప్రసాద్, నరేశ్ దొంగలుగా, త్రిగుణ్, శివ్ గాడ్స్‌గా బరిలోకి దిగారు. ఆటలో భాగంగా శివ్ కాలికి తీవ్రంగా గాయమైనప్పటికీ వెనకడుగు వేయకుండా హోరాహోరీగా పోరాడారు. చివరకు శివ్, త్రిగుణ్ ఈ పోరులో విజయం సాధించారు. అయితే ఇద్దరిలో ఒకరు మాత్రమే గ్రీన్ లెవల్‌లోకి వెళ్లే అవకాశం ఉంటుందని బిగ్‌బాస్ మెలిక పెట్టడంతో అసలు ఉత్కంఠ నెలకొంది.
విజయం సాధించిన వారిలో ఎవరు ముందుకు వెళ్లాలనే దానిపై శివ్‌ను త్రిగుణ్ కన్విన్స్ చేసే ప్రయత్నం చేశారు. తాను అడుక్కునే టైప్ కాదని, చేతులు చాపి అడుగుతున్నానని శివ్‌ను కోరగా, గతంలో జరిగిన విషయాలను గుర్తు చేస్తూ శివ్ కొద్దిగా వ్యంగ్యంగా స్పందించారు. అయినప్పటికీ చివరికి శివ్ అంగీకరించడంతో త్రిగుణ్‌ను గోట్ ఆఫ్ స్పీడ్‌గా ప్రకటించారు. తనను గతంలో మోసం చేసిన వ్యక్తితోనే కలిసి ఆడాల్సి వచ్చిందని, అయినప్పటికీ ఆయన పడ్డ కష్టాన్ని గుర్తించి త్రిగుణ్‌కు అవకాశం ఇచ్చినట్లు శివ్ తెలిపారు. ఈ పరిణామంతో త్రిగుణ్ ఈ వారంతో పాటు వచ్చే వారం కూడా ఎలిమినేషన్ నుంచి పూర్తిగా సేఫ్ అయినట్లు బిగ్‌బాస్ ప్రకటించారు.
ఎన్ని విమర్శలు ఎదురైనా క్లిష్టమైన సమయాల్లో తన ఆటతీరుతో ఆశ్చర్యపరిచే త్రిగుణ్, ఈ శుక్రవారం ఎపిసోడ్‌లో మరోసారి తన మార్క్ చూపించారు. ప్రత్యర్థులుగా తలపడినప్పటికీ, చివరికి పరిస్థితులకు తగినట్లుగా వ్యూహాలు మార్చుకుని విజయం సాధించడం ప్రేక్షకులను ఆకట్టుకుంది. హౌస్‌లో మారుతున్న సమీకరణాలు, టాస్క్‌లలో పోటీదారుల ఈ ప్రవర్తన రాబోయే రోజుల్లో మరింత ఆసక్తిని రేకెత్తించనుంది. గేమ్‌లో నిలదొక్కుకోవడానికి పోటీదారులు పడుతున్న కష్టం బిగ్‌బాస్ షోను రంజుగా మారుస్తోంది.
Also Read: డబ్బా జీపీలో విధుల నిర్వహణలో నిర్లక్ష్యం?
