అర్హులైన ప్రతి కూలీకి పని కల్పించాలి : ఎంపీడీవో కృష్ణవేణి

సూర్య జైనూర్‌ : వీబీజీ రామ్‌ జీ పథకం ద్వారా ఫామ్‌ పాండ్లు, ఇంకుడు గుంతల నిర్మాణ పనులకు ప్రాధాన్యం ఇవ్వాలని జైనూర్‌ ఎంపీడీవో కృష్ణవేణి సూచించారు.శనివారం మండలంలోని పోచంలొద్ది, ఉషగం గ్రామపంచాయతీల పరిధిలో జరుగుతున్న ఉపాధి పనులను పథకం సిబ్బందితో కలిసి ఆమె పరిశీలించారు. ఈ సందర్భంగా మాట్లాడుతూ, పంట కుంటల నిర్మాణంతో భూగర్భ జలమట్టం పెరిగేందుకు అవకాశం ఉంటుందని తెలిపారు. అర్హులైన ప్రతి కూలీకి పని కల్పించాలని, ఫామ్‌ పాండ్లు, ఇంకుడు గుంతల నిర్మాణాలను విస్తృతంగా చేపట్టాలని సిబ్బందికి సూచించారు.అనంతరం ఉషగం గ్రామంలో కూలీలతో కలిసి ఎంపీడీవో, సిబ్బంది అల్పాహారం చేశారు. ఈ కార్యక్రమంలో సర్పంచులు ఆత్రం నిర్మల, శశిపాల్‌, మడావి మనోహర్‌, ఏపీవో నగేష్‌, టెక్నికల్‌ అసిస్టెంట్లు ఉపేందర్‌, లింగేశ్వర్‌, పంచాయతీ కార్యదర్శి సురేఖ, ఫీల్డ్‌ అసిస్టెంట్లు, కూలీలు పాల్గొన్నారు.