టీడీపీని వీడి వైసీపీలో చేరిన నాయకుడు రమేష్ సూపర్ సిక్స్ హామీల అమలులో వైఫల్యమే పార్టీ మార్పునకు కారణం: రమేష్

బొమ్మనహల్ (రాయదుర్గం ఇంచార్జ్, మేజర్ న్యూస్) : తెలుగుదేశం పార్టీకి మరో ఎదురుదెబ్బ తగిలింది. బొమ్మనహల్ మండలం గోవిందవాడ గ్రామానికి చెందిన టీడీపీ నాయకుడు భీమన్నగారి రమేష్ వైఎస్సార్ కాంగ్రెస్ పార్టీలో చేరారు. వైసీపీ నాయకుడు మెట్టు గోవిందరెడ్డి సమక్షంలో ఆయన వైసీపీ కండువా కప్పుకున్నారు. ఈ సందర్భంగా మెట్టు గోవిందరెడ్డి రమేష్‌కు పార్టీ కండువా వేసి సాదరంగా పార్టీలోకి ఆహ్వానించారు.

ఈ సందర్భంగా రమేష్ మాట్లాడుతూ తెలుగుదేశం పార్టీలో తనకు సరైన గుర్తింపు లభించకపోవడంతో పాటు, ఎన్నికల సమయంలో ఇచ్చిన సూపర్ సిక్స్ హామీలను అమలు చేయకపోవడం వల్ల ప్రజలకు సమాధానం చెప్పలేని పరిస్థితి ఏర్పడిందని తెలిపారు. ఈ కారణాలతోనే టీడీపీని వీడి వైఎస్సార్ కాంగ్రెస్ పార్టీలో చేరాలని నిర్ణయించుకున్నట్లు వెల్లడించారు.

వైఎస్సార్ కాంగ్రెస్ పార్టీ నాయకత్వంపై నమ్మకంతో పార్టీలో చేరినట్లు పేర్కొన్న ఆయన, పార్టీ బలోపేతానికి కృషి చేస్తానని తెలిపారు. ఈ చేరికతో గోవిందవాడ గ్రామంలో వైసీపీకి మరింత బలం చేకూరుతుందని పార్టీ నాయకులు ఆశాభావం వ్యక్తం చేశారు.

ఈ కార్యక్రమంలో వైసీపీ సీనియర్ నాయకుడు, మాజీ జెడ్పీటీసీ లోకేష్, ఎంపీటీసీ అభ్యర్థి శాంతిమూర్తి, చెన్నబసవ, ధనుంజయ, ఈశ్వరప్ప, ఫకీర్ గౌడ్ తదితరులు పాల్గొన్నారు.

రిపోర్టర్ : శివప్రసాద్, రాయదుర్గం ఇంచార్జ్, రాయదుర్గం.