హైస్కూల్ గ్రౌండ్‌లో రొయ్యల లోడింగ్: దుర్వాసనతో విద్యార్థుల అవస్థలు
అంబాజీపేట:మేజర్ న్యూస్ :అంబాజీపేట మండలం ఇసుకపూడి గ్రామంలో బాధ్యతారాహిత్య చర్యలు తీవ్ర కలకలం రేపుతున్నాయి. గ్రామంలోని జిల్లా పరిషత్ ఉన్నత పాఠశాల (ZPHS) ఆవరణ సమీపంలో ఉన్న పచ్చి రొయ్యల చెరువుల నుండి రొయ్యలు పట్టిన వ్యాపారులు, లోడింగ్ ప్రక్రియను నేరుగా పాఠశాల ఆటల మైదానంలోనే చేపట్టడం వివాదాస్పదంగా మారింది.
రొయ్యలను ఐస్ వేసి బాక్సుల్లో నింపే క్రమంలో వెలువడిన మురుగునీరు (వేస్ట్ వాటర్) అంతా పాఠశాల గ్రౌండ్‌లోనే ఉండిపోయింది. నీరు నిల్వ ఉండిపోవడం వల్ల పాఠశాల ప్రాంగణమంతా తీవ్రమైన కంపు కొడుతోంది. నిత్యం వందలాది మంది విద్యార్థులు చదువుకునే, ఆటలాడుకునే గ్రౌండ్‌లో ఈ రసాయనాలు కూడిన నీరు నిలిచిపోవడంతో ఈగలు, దోమలు ముసిరి వ్యాధులు వ్యాపించే ప్రమాదం ఉందని గ్రామస్థులు ఆందోళన చెందుతున్నారు.
పాఠశాల ఆవరణను వ్యాపార అవసరాలకు వాడుకుంటూ అపరిశుభ్రం చేసిన వారిపై స్థానిక పంచాయతీ, విద్యాశాఖ అధికారులు తక్షణమే కఠిన చర్యలు తీసుకోవాలని ఇసుకపూడి గ్రామస్థులు, విద్యార్థుల తల్లిదండ్రులు డిమాండ్ చేస్తున్నారు.
