గోదావరి ఘాట్లకు పోటెత్తిన భక్తులు
రాజమహేంద్రవరం/భద్రాచలం: పవిత్ర కార్తీకమాసం మొదటి సోమవారం కావడంతో గోదావరి తీర ప్రాంతాల్లో ఆధ్యాత్మిక శోభ సంతరించుకుంది. తెల్లవారుజాము నుంచే భక్తులు వేలాదిగా తరలిరావడంతో గోదావరి స్నాన ఘట్టాలన్నీ భక్తులతో కిటకిటలాడుతున్నాయి. నదిలో పుణ్యస్నానాలు ఆచరించిన అనంతరం భక్తులు కార్తీక దీపాలు వదులుతూ ప్రత్యేక పూజలు నిర్వహిస్తున్నారు. మరోవైపు శివాలయాలకు భక్తుల తాకిడి విపరీతంగా పెరిగింది. 'ఓం నమః శివాయ' అంటూ పంచాక్షరీ మంత్ర జపంతో ఆలయ ప్రాంగణాలు మారుమోగుతున్నాయి. భక్తుల రద్దీని దృష్టిలో ఉంచుకుని అధికారులు ఘాట్లు, ఆలయాల వద్ద ప్రత్యేక ఏర్పాట్లు చేశారు.