గంగమ్మ ఒడికి చేరిన అతి భారీ ఏకదంత వినాయకుడు

- 25 రోజులపాటు విశేష పూజలు,అభిషేకాలు
- ప్రత్యేక ఆకర్షణగా నిలిచిన కళాబృందాలు
మదనపల్లె : అన్నమయ్య జిల్లా కేంద్రమైన మదనపల్లె పట్టణం,సిటిఎం రోడ్డు,జీఆర్టీ జ్యువలరీస్ ఎదురుగా ఏకదంతాయ మిత్రమండలి సభ్యుల ఆధ్వర్యంలో ప్రతిష్ఠించిన భారీ ఏకదంత వినాయకుడు గంగమ్మ ఒడికి చేరుకున్నారు.మదనపల్లె ప్రజలనే కాదు,చుట్టుపక్కల గ్రామాలు,పట్టణాల ప్రజలను సైతం తనవైపు తిప్పుకున్నాడు.25 అడుగుల గణనాధుడు 25 రోజుల నిత్యపూజలు అందుకున్న విఘ్నశ్వరుడి నిమజ్జనోత్సవం భక్తి,కళ,సంస్కృతి,సంప్రదాయాల మహాసంగమం నడుమ కన్నుల పండుగలా సాగింది.మదనపల్లెకు మరో ప్రత్యేక గౌరవాన్ని తీసుకొచ్చిన అద్భుతం ఏమిటంటే పూరీ జగన్నాథ ఆలయంపైన రెపరెపలాడే పవిత్ర జెండా,ఏకదంతాయ మిత్ర మండలి మండపంపైకి చేరడమని తెలిపారు.ఇది కేవలం ఒక జెండా కాదు,ఒక ఆధ్యాత్మిక అనుభూతి,ఒక మహద్భాగ్యం,మదనపల్లెకు దక్కిన అపూర్వ గౌరవం.ఈ 25 రోజుల వేడుకలకు ఘనమైన ముగింపుగా అక్టోబర్ 8న జరిగిన వినాయక నిమజ్జన మహోత్సవం మదనపల్లె చరిత్రలోనే ఒక అద్భుత దృశ్యంగా నిలిచిపోయింది.కాశీ నుంచి కన్యాకుమారి వరకు భారతదేశంలోని వివిధ ప్రాంతాల కళలు,సంప్రదాయాలను ప్రతిబింబించేలా దాదాపు 350 నుంచి 400 మంది కళాకారులు ఈ మహా ఊరేగింపులో పాల్గొని తమ అద్భుతమైన కళా ప్రదర్శనలతో మదనపల్లెను హోరెత్తించారు.నాసిక్ డోలు,నరసింహ అవతారం,హోస్పేట్ డ్రమ్స్,తెలంగాణ-ఆంధ్ర సంప్రదాయ కళలు,తెనాలి కళాకారుల ప్రదర్శనలు,డిజె 
కోలాటం,చెండమేళం,తెయ్యం,బ్యాండ్ సెట్స్,కొమ్ములు,చక్కభజన,పిల్లనగ్రోవి వాయిద్యాలు,పాలకీలు ఆకర్షణగా నిలిచాయి.ఇలా ఒక్కో కళారూపం,ఒక్కో సంప్రదాయం,ఒక్కో వాయిద్యం పువీధుల్లో ఒక మహాకళా వైభవాన్ని ఆవిష్కరించింది.వేలాది మంది ప్రజలు రోడ్లకు ఇరువైపులా నిలబడి భక్తిశ్రద్ధలతో,ఆనందోత్సాహాలతో తమ ప్రియమైన ఏకదంతుడి మహా ఊరేగింపును వీక్షిస్తూ వీడ్కోలు పలికారు.చిన్నారుల నుంచి పెద్దల వరకు,మహిళల నుంచి యువత వరకు మదనపల్లె మాత్రమే కాదు,చుట్టుపక్కల ప్రాంతాల నుంచి కూడా వేలాదిగా భక్తులు తరలివచ్చి ఒక్కసారిగా భక్తిసాగరంగా మార్చేశారు.ఇది కేవలం ఒక వినాయక చవితి వేడుక కాదు,ఇది భక్తికి ప్రతిరూపం,
ఇది కళలకు వేదిక,ఇది సంప్రదాయాలకు పండుగ,ఇది మదనపల్లె ఐక్యతకు ప్రతీక,ఇది ఏకదంతాయ మిత్ర మండలి సృష్టించిన ఒక మరపురాని చరిత్రని పట్టణ ప్రజలు,భక్తులు అభివర్ణించారు.

కె. ఈశ్వర్ రెడ్డి, మదనపల్లి నియోజకవర్గం ఇంచార్జి