చీమకుర్తి మున్సిపాలిటీ ఎన్నికల డిస్ట్రిబ్యూషన్ సెంటర్‌ను పరిశీలించిన జనరల్ అబ్జర్వర్
చీమకుర్తి, మేజర్‌న్యూస్‌ :
చీమకుర్తి మున్సిపాలిటీకి ఎన్నికల నిర్వహణలో భాగంగా చీమకుర్తిలోని ప్రభుత్వ ఉన్నత పాఠశాల ప్రాంగణంలో ఏర్పాటు చేసిన ఎన్నికల సామగ్రి డిస్ట్రిబ్యూషన్ సెంటర్‌ను ఎన్నికల జనరల్ అబ్జర్వర్ శ్రీమతి కె.హెప్సిబా రాణి, జాయింట్ కలెక్టర్ శ్రీమతి కల్పనా కుమారి శనివారం పరిశీలించారు. కౌంటర్లు, పోలింగ్ సామగ్రి పంపిణీ విభాగాలు, భద్రతా ఏర్పాట్లు మరియు సిబ్బంది కేటాయింపు ప్రక్రియలను వారు క్షుణ్ణంగా పరిశీలించారు. పూర్తిస్థాయిలో సామగ్రితో పోలింగ్ కేంద్రాలకు వెళ్లాలని సిబ్బందికి చెప్పారు. పోలింగ్ రోజు ఉదయం పోటీలో ఉన్న అభ్యర్థుల పోలింగ్ ఏజెంట్ల సమక్షంలో ఖాళీ బ్యాలెట్ బాక్సులను చూపించి, వారి ముందే నిబంధనల ప్రకారం సీల్ చేయాలని సూచించారు. పోలింగ్ కేంద్రాల్లో ఓటింగ్ రహస్యత లోపించకుండా ఓటింగ్ కంపార్ట్‌మెంట్‌లను సరైన స్థలంలో ఏర్పాటు చేయాలని ఆదేశించారు. డిస్ట్రిబ్యూషన్ సెంటర్ నుంచి పంపిణీ, ఎన్నికల అనంతరం బ్యాలెట్ బాక్స్ లను స్ట్రాంగ్ రూములకు తరలించే ప్రక్రియలో భద్రత పరంగా ఎలాంటి లోపాలు లేకుండా ఎన్నికల సంఘ మార్గనిర్దేశాలను పాటించాలని వారు స్పష్టం చేశారు.
