మర్పల్లి శివారులో పేకాట స్థావరంపై పోలీసుల దాడి.. ఏడుగురు అరెస్ట్

మర్పల్లి, మేజర్ న్యూస్:మర్పల్లి మండల శివారులోని అబ్దుల్ రెహమాన్ వెంచర్‌లో నిర్వహిస్తున్న పేకాట స్థావరంపై పోలీసులు ఆకస్మిక దాడి చేసి ఏడుగురిని పట్టుకున్నారు. వారి వద్ద నుంచి రూ.52,240 నగదుతో పాటు పేకముక్కలను స్వాధీనం చేసుకుని కేసు నమోదు చేసినట్లు పోలీసులు తెలిపారు.వివరాల్లోకి వెళితే.. అక్టోబర్ 30వ తేదీ రాత్రి సుమారు 11 గంటల సమయంలో అబ్దుల్ రెహమాన్ వెంచర్‌లో కొందరు వ్యక్తులు ప్రభుత్వం నిషేధించిన పేకాట ఆడుతున్నట్లు మర్పల్లి పోలీసులకు విశ్వసనీయ సమాచారం అందింది. దీంతో ఎస్సై అబ్దుల్ రవూఫ్ తన సిబ్బందితో కలిసి సదరు ప్రాంతంలో ఆకస్మిక తనిఖీలు చేపట్టారు. ఈ క్రమంలో నగదు పందాలు కాస్తూ పేకాట ఆడుతున్న ఏడుగురు వ్యక్తులు పోలీసులను చూసి పారిపోయేందుకు ప్రయత్నించగా వారిని పట్టుకున్నారు. వారి వద్ద ఉన్న రూ.52,240 నగదుతో పాటు పేకముక్కలను స్వాధీనం చేసుకున్నారు. ఈ ఘటనపై ఏడుగురిపై కేసు నమోదు చేసి తదుపరి చర్యలు చేపట్టినట్లు పోలీసులు వెల్లడించారు. పేకాట, ఇతర అసాంఘిక కార్యకలాపాలకు పాల్పడితే కఠిన చర్యలు తీసుకుంటామని పోలీసులు హెచ్చరించారు.