నియోజకవర్గంలోని బాసర, ముథోల్,తానూర్, లోకేశ్వరం,నర్సాపూర్ (జి) మండలాలను కరువు మండలాలుగా ప్రకటించాలని మాజీ ఎమ్మెల్యే గడ్డిగారి విఠల్ రెడ్డి శనివారం నిర్మల్ జిల్లా కలెక్టర్ భవేష్ మిశ్రా ను కలిసి వినతిపత్రం అందజేశారు. ఈ ఏడాది ఎల్‌నినో ప్రభావంతో పంటలు నష్టపోయిన రైతులను తగిన న్యాయం చేసి ఆదుకోవాలన్నారు.రైతులకు పంట నష్టపరిహారంతో పాటు ఇన్‌పుట్ సబ్సిడీ, ప్రభుత్వం అందించే ఇతర సహాయ సదుపాయాలను కల్పించాలని విజ్ఞప్తి చేశారు. దీంతోపాటు తాగునీటి అవసరాల కోసం బోర్లు మంజూరు చేయాలని, పశువులకు సరిపడా మేత సౌకర్యం కల్పించాలని కలెక్టర్‌ను కోరారు. నియోజకవర్గం లోని రైతులు, గ్రామీణ ప్రజలు ఎదుర్కొంటున్న సమస్యలను దృష్టిలో ఉంచుకుని తక్షణ చర్యలు చేపట్టాలని వినతిపత్రంలో పేర్కొన్నారు.
