ఎన్నికల నేపథ్యంలో వాహన తనిఖీలు ముమ్మరం చేయాలి

పార్వతిపురం, సూర్య : సాలూరు మున్సిపాలిటీ ఎన్నికల నేపథ్యంలో అక్రమ మద్యం, ఇతర నిషేధిత వస్తువుల రవాణాకు అడ్డుకట్ట వేసేందుకు ప్రతి వాహనాన్ని క్షుణ్ణంగా తనిఖీ చేయాలని జిల్లా ప్రొహిబిషన్ అండ్ ఎక్సైజ్ అధికారి కె. సహదేవ సిబ్బందికి ఆదేశించారు. ఈ మేరకు శనివారం పార్వతీపురం మన్యం జిల్లా ప్రొహిబిషన్ అండ్ ఎక్సైజ్ అధికారి కె. సహదేవ పార్వతిపురం మండల పరిధిలోని పి.కొనవలస చెక్‌పోస్టును సందర్శించారు. ఈ సందర్భంగా చెక్‌పోస్టు వద్ద నిర్వహిస్తున్న తనిఖీ ప్రక్రియను పరిశీలించి, అటుగా రాకపోకలు సాగిస్తున్న వాహనాలను క్షుణ్ణంగా తనిఖీ చేశారు. ఎన్నికల సమయంలో అక్రమ మద్యం తరలింపు, ఇతర నిబంధనలకు విరుద్ధమైన కార్యకలాపాలకు అవకాశం లేకుండా అప్రమత్తంగా వ్యవహరించాలని సూచించారు. చెక్‌పోస్టు వద్ద విధులు నిర్వహిస్తున్న ఎక్సైజ్ సిబ్బందితో మాట్లాడి తనిఖీల నిర్వహణ తీరును సమీక్షించారు. ముఖ్యంగా అనుమానాస్పదంగా కనిపించే వాహనాలపై ప్రత్యేక దృష్టి సారించాలని, ఎలాంటి వాహనాన్ని తనిఖీ చేయకుండా విడిచిపెట్టకూడదని స్పష్టం చేశారు. ఎన్నికల నియమావళికి విరుద్ధంగా మద్యం లేదా ఇతర నిషేధిత వస్తువుల రవాణా జరగకుండా నిరంతరం నిఘా కొనసాగించాలని ఆదేశించారు. ఎన్నికల ప్రక్రియ ప్రశాంతంగా, పారదర్శకంగా సాగేందుకు ఎక్సైజ్ శాఖ సిబ్బంది బాధ్యతాయుతంగా విధులు నిర్వర్తించాలని, చెక్‌పోస్టు వద్ద తనిఖీలను నిరంతరం కొనసాగిస్తూ అప్రమత్తంగా ఉండాలని సిబ్బందికి సూచించారు.