ఆర్థిటి హాస్పిటల్ విషాదం.. ఉరి వేసుకుని స్టాఫ్ నర్స్ ఆత్మహత్య.

కళ్యాణదుర్గం: పట్టణంలోని ఆర్‌డీటీ ఆసుపత్రిలో విషాదకర ఘటన చోటుచేసుకుంది. ఆసుపత్రిలో స్టాఫ్ నర్సుగా విధులు నిర్వహిస్తున్న భార్గవి ఆత్మహత్యకు పాల్పడిన ఘటన స్థానికంగా కలకలం రేపింది. ఆసుపత్రి ప్రాంగణంలోని హాస్టల్ గదిలో ఆమె ఉరివేసుకున్న స్థితిలో కనిపించినట్లు సమాచారం. ఈ ఘటనతో ఆసుపత్రి సిబ్బంది, తోటి ఉద్యోగులు తీవ్ర దిగ్భ్రాంతికి గురయ్యారు. సమాచారం అందుకున్న పోలీసులు ఘటనకు సంబంధించిన వివరాలను సేకరించే పనిలో నిమగ్నమయ్యారు. భార్గవి మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించినట్లు తెలిసింది. అయితే ఆమె ఆత్మహత్యకు పాల్పడటానికి గల కారణాలు ఇప్పటివరకు స్పష్టంగా తెలియరాలేదు. వ్యక్తిగత కారణాలా, విధులకు సంబంధించిన ఒత్తిడా లేక ఇతర అంశాలేమైనా ఉన్నాయా అన్న విషయాలపై స్పష్టత రావాల్సి ఉంది. మరోవైపు ఈ ఘటనకు సంబంధించి ఆసుపత్రి యాజమాన్యం నుంచి పూర్తి వివరాలు వెల్లడికాకపోవడంతో పలు సందేహాలు వ్యక్తమవుతున్నాయి. ఘటన జరిగిన పరిస్థితులు, ఆమె ఆత్మహత్యకు ముందు ఏవైనా పరిణామాలు చోటుచేసుకున్నాయా అనే కోణాల్లో పోలీసులు విచారణ చేపట్టాల్సి ఉంది. మృతురాలి కుటుంబ సభ్యులకు సమాచారం అందించారా, వారి ఫిర్యాదు మేరకు ఎలాంటి చర్యలు తీసుకున్నారు అనే వివరాలు తెలియాల్సి ఉంది. పోస్టుమార్టం నివేదిక, పోలీసుల విచారణ అనంతరం మరణానికి గల కారణాలపై స్పష్టత వచ్చే అవకాశం ఉంది. ఈ ఘటనకు సంబంధించి అధికారిక సమాచారం వెలువడాల్సి ఉంది.
కళ్యాణదుర్గం టౌన్ రిపోర్టర్ :- బోయ రంగస్వామి.