యాసంగిలో వరి సాగు వద్దు! - ఆరుతడి పంటల వైపు మొగ్గు చూపాలి - జిల్లా కలెక్టర్ కోయ శ్రీహర్ష
సూర్య - పెద్దపల్లి: యాసంగి సీజన్లో జిల్లాలో వరి సాగు పూర్తిగా నష్టదాయకమని, రైతులు తక్కువ నీటితో పండే ఆరుతడి పంటల సాగు వైపు మళ్లాలని జిల్లా కలెక్టర్ కోయ శ్రీహర్ష సూచించారు. మంగళవారం కలెక్టరేట్లో యాసంగి సాగు ప్రణాళికపై వ్యవసాయ, ఉద్యానవన శాఖ అధికారులతో సమీక్ష నిర్వహించారు. జిల్లాలో భూగర్భ జలమట్టాలు తగ్గిపోవడంతో పాటు ఎస్సారెస్పీలోనూ నీటి నిల్వలు తక్కువగా ఉన్నాయని, సాగునీరు విడుదల చేసే పరిస్థితి లేదని స్పష్టం చేశారు. అందుబాటులో ఉన్న నీరు తాగునీటి అవసరాలకే సరిపోతుందన్నారు.రైతులు వరికి బదులుగా మొక్కజొన్న తదితర ఆరుతడి పంటలు సాగు చేసేలా గ్రామస్థాయిలో అవగాహన కల్పించాలని అధికారులను ఆదేశించారు. ఒక ఎకరం వరి సాగుకు వినియోగించే నీటితో నాలుగు ఎకరాల్లో మొక్కజొన్న పండించవచ్చని తెలిపారు. ప్రత్యామ్నాయ పంటలకు అవసరమైన విత్తనాలను సబ్సిడీపై ముందుగానే అందుబాటులో ఉంచాలని సూచించారు. సమావేశంలో జిల్లా వ్యవసాయ అధికారి శ్రీనివాస్, ఉద్యానవన శాఖ అధికారి ప్రసాద్, ఇతర అధికారులు పాల్గొన్నారు.