లలితకళా ఉత్సవం కోసం బాల కుటీర్ నిర్వహించే రాష్ట్రస్థాయి పోటీలకు ఆహ్వానం
Lగుంటూరు: లలితకళలను ప్రోత్సహించడం కోసం బాల కుటీర్ గత 31 సంవత్సరాలుగా సంస్థ వ్యవస్థాపకులలో ఒకరైన గరిగె ప్రభావతి స్మృతి దినోత్సవం సందర్భంగా డిసెంబర్ 10వ తేదీన లలిత కళా ఉత్సవాన్ని నిర్వహిస్తోంది. వివిధ లలిత కళల్లో ప్రతిభావంతులైన బాలలకు "ప్రతిభా పల్లవం" పురస్కారాన్ని, ఎంపిక చేసిన బాల సాహితీ సృజనకర్తలకు "మంగాదేవి బాలసాహిత్య పురస్కారాన్ని", బాల సేవా తత్పరులకు "మంగాదేవి విశిష్ట సేవా పురస్కారాన్ని”, మహిళాభ్యున్నతికి విశేష సేవలందిస్తున్న వారికి "మాలతీ ప్రమదా పురస్కారాన్ని" అందజేసి సత్కరిస్తోంది.ఈ సందర్భంగా బాలల సృజనాత్మకతను గుర్తించి ప్రోత్సహించడానికి రాష్ట్రస్థాయిలో వివిధ పోటీలను నిర్వహిస్తోంది. విద్యార్థులను, గురువులను ఆయా పోటీల పాల్గొనేలా ప్రోత్సహించవలసినదిగా పాఠశాలల ప్రధానోపాధ్యాయులకు బాల కుటీర్ వ్యవస్థాప కురాలు డాక్టర్ నన్నపనేని మంగాదేవి విజ్ఞప్తి చేశారు. చిత్రలేఖనం, కాగితపు బొమ్మలు, కథా రచన, కవితా రచన, లేఖా రచనలలో పోటీలు నవంబరు 23 వ తేదీన మూడు వేదికలలో అనగా శ్రీ వెంకటేశ్వర బాల కుటీర్, మూడవ లైన్, శ్యామల నగర్ నందు, చేతన ఛారిటబుల్ ట్రస్ట్, చౌడవరం నందు, హిందీ ప్రేమి మండలి మహావిద్యాలయ ప్రాంగణం, నాజరు పేట తెనాలి నందు నిర్వహిస్తున్నామని పాఠశాలలు తమకు అనుకూలమైన ఏదైనా ఒక వేదికలో తమ విద్యార్థులను పాల్గొనేలా ప్రోత్సహించవలసినదిగా ఆమె తెలియజేశారు. గాత్రము, వాద్య సంగీతంలో వ్యక్తిగతంగాను, బృందగానాల రూపంలోనూ పోటీలు డిసెంబరు 10 న శ్రీ వెంకటేశ్వర బాల కుటీర్, మూడవ లైన్, శ్యామల నగర్, గుంటూరు నందు జరుగుతాయని ఆమె తెలియజేశారు. విజేతలందరికీ సర్వోత్తమ, విశిష్టోత్తమ, ఉత్తమ వ్యక్తిగత నగదు బహుమతులు ఉంటాయని, బృందగానాల పోటీలలో సర్వోత్తమ, విశిష్టోత్తమ, ఉత్తమ స్థానాలలో నిలిచిన బృందాలకు బహుమతుల క్రింద ఒక్కొక్క బృందానికి 5 వేలు, 4వేలు, 3 వేల రూపాయల బహుమతులు, గురువులకు 4 వేలు, 3 వేలు, 2 వేల రూపాయల బహుమతులు ఉంటాయని ఆమె తెలియజేశారు. పోటీదారులు నవంబరు 18 లోగా ఆన్లైన్ లో మాత్రమే వారి పేర్లను రిజిస్టరు చేసుకోవలసి ఉంటుంది. నవంబరు 23, డిసెంబర్ 10 తేదీలలో నిర్వహించబడే వివిధ పోటీల వివరాలను 0863-2232405, 9390115480, 9390115487 నంబర్లకు ఫోన్ చేసి కనుగొనవచ్చు. ఇతర వివరాలు, రిజిస్ట్రేషన్ ఫారం స్కూల్ వెబ్ సైట్ www.svbk.in లో పొందవచ్చని డా. మంగాదేవి తెలియజేశారు.
సూర్య నాయక్