భూభారతి పెండింగ్ దరఖాస్తులు త్వరగా పరిష్కరించాలి
సూర్య - పెద్దపల్లి: భూభారతి పెండింగ్ దరఖాస్తులు, భూ రీ-సర్వే ప్రక్రియను వేగవంతం చేసి నిర్ణీత గడువులోగా పూర్తి చేయాలని రెవెన్యూ శాఖ కార్యదర్శి డి.ఎస్. లోకేష్ కుమార్ అధికారులను ఆదేశించారు. మంగళవారం హైదరాబాద్ నుంచి అన్ని జిల్లాల రెవెన్యూ అదనపు కలెక్టర్లతో నిర్వహించిన వీడియో కాన్ఫరెన్స్లో ఆయన మాట్లాడారు. భూదాన్ భూములు, భూసేకరణ, హైకోర్టు కేసుల పరిష్కారంపై ప్రత్యేక దృష్టి సారించాలని సూచించారు. రీ-సర్వే త్వరగా పూర్తయ్యేలా సర్వే బృందాలను కేటాయించి, ప్రణాళికాబద్ధంగా పనులు చేపట్టాలన్నారు. అలాగే జీఓ 58, 59, 76 కింద పెండింగ్లో ఉన్న దరఖాస్తులను క్షేత్రస్థాయిలో పరిశీలించి నిర్దిష్ట గడువులోగా పరిష్కరించాలని ఆదేశించారు. ఈ వీడియో కాన్ఫరెన్స్లో పెద్దపల్లి అదనపు కలెక్టర్ (రెవెన్యూ) బి. శ్రీరాములు, కలెక్టరేట్ అధికారులు, రెవెన్యూ సిబ్బంది పాల్గొన్నారు.