వైకుంఠధామం అభివృద్ధి, సీసీ రోడ్ల నిర్మాణానికి బోయపల్లి కొండల్‌రెడ్డి వినతి
ఘట్కేసర్ రూరల్, మేజర్ న్యూస్ : మల్కాజిగిరి మున్సిపల్ కార్పొరేషన్ ఘట్కేసర్ సర్కిల్ పోచారం డివిజన్ పరిధిలోని అన్నోజిగూడ వైకుంఠధామంలో అసంపూర్తిగా ఉన్న అభివృద్ధి పనులను త్వరితగతిన పూర్తి చేయడంతోపాటు, పలు కాలనీల్లో సీసీ రోడ్లు నిర్మించాలని మాజీ మున్సిపల్ చైర్మన్ బోయపల్లి కొండల్‌రెడ్డి కోరారు. ఈ మేరకు బుధవారం ఘట్కేసర్ సర్కిల్ కార్యాలయంలో డిప్యూటీ కమిషనర్ వాణిని కలిసి వినతిపత్రం అందజేశారు. అన్నోజిగూడ జనరల్ వైకుంఠధామంలో ఇంకా మిగిలి ఉన్న సుమారు 20 శాతం పనులను పూర్తి చేసి ప్రజలకు అందుబాటులోకి తీసుకురావాలని విజ్ఞప్తి చేశారు. అలాగే నల్లపోచమ్మ, ఎర్రపోచమ్మ ఆలయం నుంచి సూర్యనగర్, వెంకటసాయినగర్ కాలనీల వరకు, ఎన్‌టీపీసీ రోడ్డు నుంచి జైపురి కాలనీ వరకు సీసీ రోడ్లు నిర్మించి రాకపోకలకు ఇబ్బందులు లేకుండా చూడాలని కోరారు. ఈ వినతిపై డిప్యూటీ కమిషనర్ వాణి సానుకూలంగా స్పందించినట్లు బోయపల్లి కొండల్‌రెడ్డి తెలిపారు.
