telangana
తెలంగాణలో భారీగా ఐపీఎస్‌ల బదిలీలు.. హైదరాబాద్ కొత్త సీపీగా మహేష్ భగవత్
హైదరాబాద్: తెలంగాణ రాష్ట్ర పోలీస్ శాఖలో భారీ ప్రక్షాళన చోటుచేసుకుంది. పరిపాలనాపరమైన సౌలభ్యంలో భాగంగా రాష్ట్ర ప్రభుత్వం ఒకేసారి 21 మంది ఐపీఎస్ అధికారులను బదిలీ చేస్తూ గురువారం కీలక ఉత్తర్వులు జారీ చేసింది. ఈ బదిలీల్లో భాగంగా హైదరాబాద్ నగర పోలీస్ కమిషనర్ (సీపీ)గా సీనియర్ ఐపీఎస్ అధికారి మహేష్ మురళీధర్ భగవత్ నియమితులయ్యారు. ఇప్పటివరకు హైదరాబాద్ సీపీగా బాధ్యతలు నిర్వర్తించిన వీసీ సజ్జనార్‌ను ఫైర్ అండ్ డిజాస్టర్ రెస్పాన్స్ డీజీగా ప్రభుత్వం బదిలీ చేసింది.
అలాగే, ఏసీబీ డీజీగా చారుసిన్హా, ఆర్టీసీ ఎండీగా అనిల్‌కుమార్‌, పౌర సరఫరాలశాఖ కమిషనర్‌గా వై. నాగిరెడ్డి నియమితులయ్యారు. ఉమెన్ అండ్ సేఫ్టీ డీజీపీగా సౌమ్య మిశ్రాకు బాధ్యతలు అప్పగించగా, జైళ్ల శాఖ (ప్రిజన్స్) డీజీపీగా స్వాతి లక్రాను బదిలీ చేశారు. గ్రేహౌండ్స్, ఆక్టోపస్ ఆపరేషన్స్ డీజీపీగా విక్రమ్‌సింగ్ మాన్ నియమితులయ్యారు. మరోవైపు, తెలంగాణ ట్రాఫిక్ మేనేజ్‌మెంట్, రోడ్ అండ్ రైల్ సేఫ్టీ బ్యూరో (TG-TMARS) డైరెక్టర్‌గా ఎం. స్టీఫెన్ రవీంద్ర, జాయింట్ డైరెక్టర్‌గా జోయల్ డేవిస్, డిప్యూటీ డైరెక్టర్‌గా బాలాదేవిలకు బాధ్యతలు అప్పగించారు.
ఇక శాంతిభద్రతల (లా అండ్ ఆర్డర్) అడిషనల్ డీజీపీగా అకున్ సబర్వాల్‌ను నియమించగా, సంజయ్‌కుమార్ జైన్‌కు అడిషనల్ డీజీపీ (ట్రైనింగ్)గా అదనపు బాధ్యతలు అప్పగించారు. ఏసీబీ డైరెక్టర్‌గా ఎస్. చంద్రశేఖర్‌రెడ్డి, మల్టీ జోన్-1 ఐజీపీగా కార్తికేయ, రైల్వేస్ ఐజీపీగా కె. రమేష్ నాయుడు బదిలీ అయ్యారు.
