జాకీర్ నాయక్ ఇస్లామిక్ రీసెర్చ్ ఫౌండేషన్‌పై మరో ఐదేళ్లపాటు నిషేధం పొడిగింపు
సూర్య జాతీయ డెస్క్: వివాదాస్పద ఇస్లామిక్ ప్రచారకర్త జాకీర్ నాయక్‌కు చెందిన ఇస్లామిక్ రీసెర్చ్ ఫౌండేషన్ (ఐఆర్‌ఎఫ్) పై ఉగ్రవాద వ్యతిరేక చట్టం (యూఏపీఏ) కింద విధించిన నిషేధాన్ని కేంద్ర హోంశాఖ మరో ఐదేళ్లపాటు పొడిగించింది. దేశ భద్రతకు భంగం కలిగించేలా, మత సామరస్యాన్ని దెబ్బతీసేలా మరియు దేశ లౌకిక స్ఫూర్తిని విచ్ఛిన్నం చేసేలా సంస్థ కార్యకలాపాలు కొనసాగుతున్నాయని స్పష్టం చేస్తూ ఈ నిర్ణయం తీసుకున్నారు. చట్టవ్యతిరేక కార్యకలాపాల నిరోధక చట్టం సెక్షన్ 3లోని ఉప నిబంధనల ప్రకారం ఈ మేరకు ఉత్తర్వులు జారీ అయ్యాయి.
ముంబై కేంద్రంగా 1991 ఫిబ్రవరిలో జాకీర్ నాయక్ ఈ సంస్థను స్థాపించారు. గతంలో విదేశాలకు పారిపోయిన ఆయన మలేషియాలో నివాసం ఏర్పాటు చేసుకున్నారు. జాకీర్ నాయక్ మరియు అతని సంస్థ సభ్యులు మతాల మధ్య విద్వేషాలను రెచ్చగొట్టేలా రెచ్చగొట్టే ప్రసంగాలు చేస్తున్నారని నిఘా వర్గాలు మరియు కేంద్ర దర్యాప్తు సంస్థలు తీవ్ర ఆరోపణలు చేశాయి. యువతను తప్పుదారి పట్టించడం, హింసాత్మక ధోరణులను ప్రోత్సహించడం వంటి చర్యలకు పాల్పడుతున్నట్లు హోంశాఖ తన ప్రకటనలో పేర్కొంది.
మొదటిసారిగా కేంద్ర ప్రభుత్వం 2016 నవంబర్ 17న ఐఆర్‌ఎఫ్‌ను చట్టవిరుద్ధమైన సంఘంగా ప్రకటించి ఐదేళ్ల నిషేధం విధించింది. ఆ తర్వాత 2021 నవంబర్‌లో ఈ నిషేధాన్ని మరో ఐదేళ్లకు పొడిగించారు. ప్రస్తుతం ఆ గడువు ముగియనుండటంతో, సంస్థ కార్యకలాపాలు పూర్తిగా అదుపులోకి రాకపోతే పరారీలో ఉన్న సభ్యులు మళ్లీ సంఘటితమయ్యే ప్రమాదం ఉందని ప్రభుత్వం భావించింది. దేశ సార్వభౌమత్వం, సమగ్రతను దెబ్బతీసే శక్తులను అణచివేయడానికి ఈ పొడిగింపు అత్యంత కీలకమని హోంశాఖ స్పష్టం చేసింది.
