ప్రపంచ పెట్టుబడులకు తెలంగాణ స్వర్గధామం.. ‘

హైదరాబాద్: తెలంగాణ రాష్ట్రంలో ఉన్న అద్భుతమైన మౌలిక సదుపాయాలు, మానవ వనరులు మరియు అనుకూల వాతావరణాన్ని ప్రపంచానికి పరిచయం చేసి, భారీగా పెట్టుబడులను ఆకర్షించడమే లక్ష్యంగా ప్రభుత్వం ‘భారత్ సమ్మిట్’ నిర్వహిస్తోందని ముఖ్యమంత్రి శ్రీ ఎ. రేవంత్ రెడ్డి స్పష్టం చేశారు. డిసెంబర్ 7, 8, 9 తేదీల్లో ప్రతిష్టాత్మకంగా నిర్వహించనున్న ‘ఇన్వెస్ట్ తెలంగాణ గ్లోబల్ సమ్మిట్ 2026’కు సన్నాహకంగా హైదరాబాద్‌లో రెండు రోజుల పాటు నిర్వహిస్తున్న భారత్ సమ్మిట్‌పై బోధి పెవిలియన్‌లో ఆయన మీడియా సమావేశం నిర్వహించారు. ఉప ముఖ్యమంత్రి మల్లు భట్టి విక్రమార్క, మంత్రులు ఉత్తమ్ కుమార్ రెడ్డి, దుద్దిళ్ల శ్రీధర్ బాబు, పొన్నం ప్రభాకర్, వివేక్ వెంకటస్వామి, మహమ్మద్ అజారుద్దీన్, కేంద్ర మాజీ మంత్రి సల్మాన్ ఖుర్షీద్ తదితరులతో కలిసి సీఎం మాట్లాడారు.

70 దేశాల ప్రతినిధులే తెలంగాణకు బ్రాండ్ అంబాసిడర్లు:

గతేడాది తరహాలోనే ఈ ఏడాది కూడా భారత్ సమ్మిట్‌కు విశేష స్పందన లభిస్తోందని సీఎం తెలిపారు. దాదాపు 70 దేశాల నుండి మంత్రులు, పెట్టుబడిదారులు, పర్యావరణవేత్తలు, జర్నలిస్టులు, వివిధ రంగాల నిపుణులతో కూడిన వెయ్యి మంది ప్రతినిధులు ఇందులో పాల్గొంటున్నారని వివరించారు. పర్యావరణం, మౌలిక సదుపాయాలు, పెట్టుబడులు వంటి అంశాలపై జరిగే సెమినార్ల ద్వారా తెలంగాణలోని ప్రజాస్వామిక, సానుకూల వాతావరణాన్ని చూసి, తిరిగి వెళ్లే ప్రతినిధులు రాష్ట్రానికి ‘బ్రాండ్ అంబాసిడర్లు’గా మారుతారని ఆశాభావం వ్యక్తం చేశారు.

గిగ్ వర్కర్లకు అండగా దేశంలోనే అత్యుత్తమ పాలసీ.. రాహుల్ గాంధీ ఆవిష్కరణ:

దేశవ్యాప్తంగా ఎలాంటి భద్రత లేక ఇబ్బందులు పడుతున్న ప్లాట్‌ఫామ్ వర్కర్లు, డ్రైవర్లు, కొరియర్లు, ఇళ్లల్లో పనిచేసే కార్మికుల సంక్షేమం కోసం తెలంగాణ ప్రభుత్వం దేశంలోనే అత్యుత్తమ ‘గిగ్ వర్కర్స్ పాలసీ’ని తీసుకొచ్చిందని రేవంత్ రెడ్డి పేర్కొన్నారు. ఈ పాలసీ ఆవిష్కరణ కార్యక్రమానికి మరియు భారత్ సమ్మిట్‌లో సందేశం ఇవ్వడానికి లోక్‌సభ ప్రతిపక్ష నాయకుడు రాహుల్ గాంధీని ఆహ్వానించినట్లు వెల్లడించారు.

రాజకీయ విమర్శలొద్దు.. అభివృద్ధికి అడ్డుపడొద్దు:

2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడం, యువతకు ఉపాధి కల్పించడమే తమ ప్రభుత్వ లక్ష్యమని సీఎం పునరుద్ఘాటించారు. ఢిల్లీలో నిర్వహించిన కర్టెన్ రైజర్ కార్యక్రమానికి కేంద్ర మంత్రి పీయూష్ గోయల్‌ను ఆహ్వానించామని గుర్తుచేస్తూ.. గతంలో ప్రధాని రాజీవ్ గాంధీ ప్రతిపక్ష నేత వాజ్‌పేయిని దేశ ప్రతినిధిగా విదేశాలకు పంపిన స్ఫూర్తిని ప్రస్తావించారు. సాంస్కృతికంగా, సాంకేతికంగా ఎదుగుతున్న హైదరాబాద్ బ్రాండ్ ఇమేజ్‌ను పెంచే ఇలాంటి కార్యక్రమాలను గుడ్డిగా వ్యతిరేకించవద్దని, అర్థరహిత ఆరోపణలతో ప్రజలను తప్పుదోవ పట్టించవద్దని ప్రతిపక్షాలకు ముఖ్యమంత్రి విజ్ఞప్తి చేశారు.