*పారిశ్రామిక ప్రాంతంలో రోడ్లపైనే భారీ వాహనాల పార్కింగ్*

జిన్నారం;గడ్డపోతారం మున్సిపాలిటీ పరిధిలోని పారిశ్రామిక ప్రాంతంలో భారీ వాహనాల పార్కింగ్ సమస్య రోజురోజుకూ తీవ్రమవుతోంది. పరిశ్రమల యాజమాన్యాలు ప్రత్యేక పార్కింగ్ స్థలాలను ఏర్పాటు చేయకుండా ప్రధాన రహదారులపైనే భారీ వాహనాలను నిలుపుతున్నాయని స్థానికులు ఆరోపిస్తున్నారు. లీ ఫార్మా, విరుపాక్ష, మైలాన్, హెట్రో, లుసెంట్ తదితర పరిశ్రమలకు చెందిన వాహనాలు రోడ్లపైనే గంటల తరబడి నిలిచి ఉండటంతో వాహనదారులు, స్థానిక ప్రజలు తీవ్ర ఇబ్బందులు ఎదుర్కొంటున్నారు. రహదారులు పార్కింగ్ స్థలాలుగా మారడంతో ట్రాఫిక్ సమస్యలు తలెత్తుతున్నాయని ఆవేదన వ్యక్తం చేస్తున్నారు. ఇప్పటికైనా సంబంధిత అధికారులు స్పందించి రోడ్లపై అక్రమ పార్కింగ్‌ను అరికట్టడంతో పాటు పరిశ్రమల యాజమాన్యాలు సొంత పార్కింగ్ సదుపాయాలు ఏర్పాటు చేసుకునేలా చర్యలు తీసుకోవాలని స్థానికులు కోరుతున్నారు.