టీఎస్‌యూటీఎఫ్ నల్లగొండ జిల్లా కార్యదర్శిగా పుట్ట రాములు బొల్లేపల్లి ఉపాధ్యాయుడికి బాధ్యతలు ఏకగ్రీవ ఎన్నిక
తెలంగాణ రాష్ట్ర ఐక్య ఉపాధ్యాయ ఫెడరేషన్ (టీఎస్‌యూటీఎఫ్) నల్లగొండ జిల్లా 7వ మహాసభలు కట్టంగూర్ మండల కేంద్రంలోని బీఎన్ గౌడ్ ఫంక్షన్ హాల్‌లో ఉత్సాహపూరిత వాతావరణం లో ఘనంగా జరిగాయి. ఈ సమావేశంలో 2026-2028 కాలానికి సంబంధించిన నల్లగొండ జిల్లా నూతన కార్యవర్గాన్ని ఏకగ్రీవంగా ఎన్నుకున్నారు. జిల్లా కార్యదర్శిగా కట్టంగూర్ మండలానికి చెందిన పుట్ట రాములు ఏకగ్రీవంగా ఎన్నికయ్యారు. ఈ సందర్భంగా నూతనంగా ఎన్నికైన జిల్లా కార్యదర్శి పుట్ట రాములు మాట్లాడుతూ ఉపాధ్యాయ సమస్యల పరిష్కారంలో నూతన కమిటీ ఎల్లప్పుడూ ముందుంటుందని, ప్రభుత్వ పాఠశాలల బలోపేతా నికి నిరంతరం కృషి చేస్తామని పిలుపునిచ్చారు. ఉపాధ్యా యుల న్యాయమైన హక్కుల సాధనకు, ప్రభుత్వ విద్యారంగ పరిరక్షణకు రాజీలేని పోరాటాలు చేస్తామని ఆయన స్పష్టం చేశారు. టీఎస్‌ యూటీఎఫ్ నల్లగొండ జిల్లా సంఘాన్ని మరింత బలోపేతం చేస్తూ ముందుకు తీసుకెళ్లేందు కు అందరూ ఐక్యంగా శ్రమించాలని కోరారు. కాగా నూతన జిల్లా కార్యదర్శిగా ఎన్నికైన పుట్ట రాములుది మండలంలోని బొల్లేపల్లి గ్రామం. ప్రస్తుతం ఆయన దుగినేవల్లి ప్రాథమిక పాఠశాలలో ఉపాధ్యాయుడిగా సేవాలందిస్తున్నారు. గతంలో ఆయన కట్టంగూర్, శాలిగౌరారం మండలాలకు టీఎస్‌యూటీఎఫ్ అధ్యక్షుడిగా వరుసగా రెండు పర్యాయాలు బాధ్యతలు నిర్వహించి, సంఘ బలోపేతానికి విశేష కృషి చేశారు. జిల్లా కార్యదర్శిగా పుట్ట రాములు ఏకగ్రీవంగా ఎన్నికవ్వడం పట్ల పలువురు ఉపాధ్యాయ నాయకులు, ప్రజాప్రతినిధులు, మండల ప్రజలు ఆయనను అభినందించారు.
