మహిళా వర్సిటీలో జల సంరక్షణపై అవగాహన

ఎడ్యుకేషన్ స్టాఫ్ రిపోర్టర్ : పద్మావతి మహిళా వర్సిటీ అంతర్జాతీయ బ్రిక్స్ కార్యక్రమంలో భాగంగా వ్యాపార నిర్వహణ విభాగం, జాతీయ సేవా పథకం సంయుక్త ఆధ్వర్యంలో మంగళవారం జల సంరక్షణ ప్రాముఖ్యత అనే అంశంపై అవగాహన కార్యక్రమాన్ని నిర్వహించారు. ఈ కార్యక్రమానికి ముఖ్యఅతిథిగా సింగపూర్ ప్లానెట్‌వైజ్ ప్రైవేట్ లిమిటెడ్, సహ వ్యవస్థాపకులు సంచాలకులు అనిల్ కాంచి, గౌరవ అతిథులుగా ప్రొఫెసర్ ఐ.వి. లలిత కుమారి, ఎన్ఎస్ఎస్ సమన్వయకర్తప్రొఫెసర్ మద్దూరు నీరజ, విద్యార్థి వ్యవహారాల సంచాలకులు ప్రొఫెసర్ బి.విజయలక్ష్మి పాల్గొన్నారు. అనంతరం ఆయన మాట్లాడుతూ భారతదేశం నీటి సంరక్షణ ఆవశ్యకత, నీటి వనరుల సమర్థ వినియోగం, పర్యావరణ పరిరక్షణ గురించి విద్యార్థులకు వివరించారు. ప్రతి ఒక్కరూ తమ దైనందిన జీవితంలో నీటిని పొదుపుగా వినియోగిస్తూ, భవిష్యత్ తరాల కోసం నీటి వనరులను కాపాడాలని సూచించారు. కార్యక్రమంలో భాగంగా విద్యార్థులు విశ్వవిద్యాలయ ప్రాంగణంలోని వర్షపు నీటి ఇంకుడు గుంతల శుభ్రత కార్యక్రమంలో ప్రత్యక్షంగా పాల్గొన్నారు. గుంతల్లో పేరుకుపోయిన చెత్తాచెదారం తొలగించి శుభ్రం చేశారు. వర్షపు నీరు ఎలాంటి ఆటంకాలు లేకుండా భూమిలోకి ఇంకేందుకు ఇంకుడు గుంతలను శుభ్రపరచడం ఎంత ముఖ్యమో ఆచరణాత్మకంగా తెలుసుకున్నారు. దీని ద్వారా భూగర్భ జలాల పెంపుదలలో వర్షపు నీటి సంరక్షణ పాత్రను అవగాహన చేసుకున్నారు. ఈ కార్యక్రమంలో ఎన్ఎస్ఎస్ అధికారులు డా.వై.సునీత, డా.వి.భార్గవి రెడ్డి, డా.హేమావతి పాల్గొన్నారు.

సీఎం గౌడ్ తిరుపతి స్టాఫ్ రిపోర్టర్