తలసేమియా రోగులకు హైదరాబాద్ పోలీసుల రక్తదానం

హిమాయత్‌నగర్‌, మేజర్ న్యూస్ : రక్తదానం ప్రాణదానంతో సమానమని రాష్ట్ర డీజీపీ సి.వి.ఆనంద్ అన్నారు. పోలీసు సంస్మరణ వారోత్సవాల్లో భాగంగా హైదరాబాద్ పోలీసులు నిర్వహించిన రక్తదాన శిబిరాల ద్వారా శివరాంపల్లిలోని తలసేమియా అండ్ సికిల్ సెల్ సొసైటీ(టీఎస్ సీఎస్)కు 560 యూనిట్ల రక్తాన్ని అందించారని టీఎస్ సీఎస్ తరఫున సీనియర్ జాయింట్ సెక్రటరీ అలీం బేగ్ శుక్రవారం ఒక ప్రకటనలో పేర్కొన్నారు. పేట్లబురుజులోని సీఏఆర్ ప్రధాన కార్యాలయంతో పాటు ఫలక్‌నుమా, శంషాబాద్, బాలాపూర్ పోలీస్ స్టేషన్ల పరిధిలో ఈ శిబిరాలు నిర్వహించారని తెలిపారు. ఈ సందర్బంగా దాతలను అభినందించినట్లు తెలిపారు. సీఏఆర్ ప్రధాన కార్యాలయంలో జరిగిన శిబిరాన్ని డీజీపీ ప్రారంభించగా, హైదరాబాద్ పోలీస్ కమిషనర్ వి.సి.సజ్జనార్, జాయింట్ కమిషనర్ తఫ్సీర్ ఇక్బాల్, డీసీపీ ఆర్.వెంకటేశ్వర్లు, టీఎస్ సీఎస్ తరఫున దుర్గాదేవి, జలీల్ పాల్గొన్నట్లు చెప్పారు.