సిద్దిపేట గడ్డపై రేవంత్ గర్జన! బీఆర్ఎస్ పాలనపై విమర్శల వర్షం..
సిద్దిపేట అర్బన్,మేజర్ న్యూస్ :
సిద్దిపేట గడ్డపై ముఖ్యమంత్రి రేవంత్ రెడ్డి రాజకీయ స్వరం గట్టిగా వినిపించారు. బీఆర్ఎస్ పదేళ్ల పాలనను లక్ష్యంగా చేసుకుని విమర్శనాస్త్రాలు సంధించారు. గత ప్రభుత్వ హయాంలో జరిగిన పాలనా తీరుపై, ప్రాజెక్టుల నిర్మాణం, సాగునీటి కేటాయింపులు, ఆర్థిక వ్యవహారాలపై పలు ప్రశ్నలు లేవనెత్తారు. కేసీఆర్ కుటుంబం అన్ని రంగాల్లోనూ కమిషన్లు, కాంట్రాక్టుల పేరుతో ప్రజాధనాన్ని దోచుకుందని ఆరోపించారు. తెలంగాణ ఉద్యమ ఆశయాలకు భిన్నంగా కుటుంబ పాలన సాగించారని విమర్శించారు. 2029లో మరోసారి ఇందిరమ్మ రాజ్యాన్ని తీసుకొచ్చి ప్రజాపాలన కొనసాగిస్తామని, సిద్దిపేట జిల్లాలోనూ కాంగ్రెస్ పార్టీ జెండా ఎగురవేస్తామని ప్రకటించారు. ముఖ్యమంత్రి ప్రసంగం సభకు హాజరైన ప్రజల్లో రాజకీయ చర్చకు దారితీసింది.
భారత తొలి మహిళా ప్రధానమంత్రి ఇందిరాగాంధీ జయంతి సందర్భంగా గురువారం సిద్దిపేటలో నిర్వహించిన భారీ బహిరంగ సభలో సీఎం రేవంత్ రెడ్డి పలు కీలక అంశాలను ప్రస్తావించారు. రాష్ట్రంలో కాంగ్రెస్ ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలను వివరించడంతోపాటు గత ప్రభుత్వ పాలనా నిర్ణయాలను ప్రశ్నించారు. సిద్దిపేట జిల్లా అభివృద్ధికి రూ.544.11 కోట్ల విలువైన పనులకు శంకుస్థాపనలు, ప్రారంభోత్సవాలు చేపట్టడం ఈ పర్యటనలో ప్రధాన ఆకర్షణగా నిలిచింది.
కేసీఆర్ కుటుంబంపై ఘాటు విమర్శలు.. కమిషన్ల కోసమేనా పాలన?
గత బీఆర్ఎస్ ప్రభుత్వ హయాంలో ప్రజల ఆస్తులు, ప్రభుత్వ వనరులు, ప్రాజెక్టుల నిర్మాణం వంటి అనేక రంగాల్లో అవినీతి చోటుచేసుకుందని ముఖ్యమంత్రి ఆరోపించారు. కేసీఆర్, హరీశ్ రావు, కేటీఆర్ కుటుంబాలకు వందల ఎకరాల ఫామ్హౌస్లు ఎలా వచ్చాయని ప్రశ్నించారు. తెలంగాణ ఉద్యమంలో ప్రాణాలను పణంగా పెట్టి పనిచేసిన ఉద్యమకారులు ఆర్థిక ఇబ్బందులతో సతమతమవుతుంటే, అధికారంలో ఉన్న కుటుంబాల ఆస్తులు మాత్రం ఎలా పెరిగాయని నిలదీశారు.
గత పాలకుల పదేళ్లలో వచ్చిన పన్నుల ఆదాయం, చేసిన అప్పులు కలిపి సుమారు రూ.28 లక్షల కోట్ల నిధుల వినియోగంపై ప్రజలకు లెక్కలు చెప్పాలని డిమాండ్ చేశారు. ప్రాజెక్టుల నిర్మాణం నుంచి వివిధ అభివృద్ధి పనుల వరకు గత పాలనలో జరిగిన వ్యవహారాలపై ప్రజలు ప్రశ్నించాలని పిలుపునిచ్చారు. ఇవన్నీ బీఆర్ఎస్ పాలనపై ముఖ్యమంత్రి చేసిన రాజకీయ ఆరోపణలుగా సభలో ప్రస్తావనకు వచ్చాయి.
కృష్ణా జలాలపై గత పాలకులదే బాధ్యత..
తెలంగాణకు కృష్ణా జలాల కేటాయింపుల విషయంలో గత పాలకుల నిర్ణయాలే దక్షిణ తెలంగాణకు నష్టం కలిగించాయని రేవంత్ రెడ్డి విమర్శించారు. 2015లో తెలంగాణకు 299 టీఎంసీల కృష్ణా జలాలు సరిపోతాయని పేర్కొన్నది అప్పటి పాలకులేనని ఆరోపించారు. పాలమూరు, నల్గొండ, ఖమ్మం జిల్లాల సాగునీటి ప్రయోజనాలను విస్మరించారని అన్నారు. రాయలసీమ ఎత్తిపోతల పథకానికి గత ప్రభుత్వం సహకరించిందని విమర్శించారు. తెలంగాణ ప్రయోజనాల విషయంలో తమ ప్రభుత్వం రాజీపడబోదని స్పష్టం చేశారు.
సిద్దిపేట అభివృద్ధికి రూ.544.11 కోట్లు
జిల్లా అభివృద్ధిపై ప్రత్యేక దృష్టి సారించామని పేర్కొన్న ముఖ్యమంత్రి రూ.544.11 కోట్ల విలువైన పనులకు శంకుస్థాపనలు, ప్రారంభోత్సవాలు చేశారు. ఇందులో రూ.451.13 కోట్లతో విద్యా సంస్థలు, తహసీల్దార్ కార్యాలయాలు, విద్యుత్ సబ్స్టేషన్ల నిర్మాణ పనులకు శంకుస్థాపనలు చేయగా, రూ.92.98 కోట్లతో పూర్తయిన వివిధ అభివృద్ధి పనులను ప్రారంభించారు.
యంగ్ ఇండియా ఇంటిగ్రేటెడ్ పాఠశాలలు, తెలంగాణ పబ్లిక్ స్కూళ్లు, మండల తహసీల్దార్ కార్యాలయాలు, విద్యుత్ సబ్స్టేషన్ల నిర్మాణాలకు ప్రాధాన్యత ఇచ్చారు. కొమురవెల్లి మల్లికార్జున స్వామి ఆలయంలో సత్రం, క్యూ కాంప్లెక్స్, గ్రామ సంఘాల భవనాలు, కేజీబీవీ భవనం తదితర అభివృద్ధి పనులను ప్రజలకు అందుబాటులోకి తీసుకొచ్చారు.
మదన్ మోహన్ రావుకు అరుదైన గౌరవం
తెలంగాణ ఉద్యమంలో కీలక పాత్ర పోషించిన మదన్ మోహన్ రావు సేవలను గుర్తించిన ముఖ్యమంత్రి కీలక ప్రకటన చేశారు. సిద్దిపేట వైద్య కళాశాలకు మదన్ మోహన్ రావు పేరు పెట్టనున్నట్లు ప్రకటించారు. ఇందుకు సంబంధించిన ప్రభుత్వ ఉత్తర్వులను 24 గంటల్లో జారీ చేయాలని వైద్య ఆరోగ్య శాఖ మంత్రిని ఆదేశించారు.
ప్రతి కుటుంబానికి రూ.5 లక్షల జీవిత బీమా
ఇందిరాగాంధీ జయంతిని పురస్కరించుకుని ప్రతి కుటుంబానికి రూ.5 లక్షల జీవిత బీమా కల్పించే ఇందిరమ్మ కుటుంబ జీవిత బీమా పథకాన్ని ముఖ్యమంత్రి ప్రారంభించారు. పేద, మధ్యతరగతి కుటుంబాలకు ఆర్థిక భద్రత కల్పించడమే లక్ష్యంగా ఈ పథకాన్ని తీసుకొచ్చినట్లు వివరించారు.
మహిళల సంక్షేమానికి ప్రభుత్వం పెద్దపీట వేస్తోందని, కోటి మంది మహిళలకు చీరల పంపిణీ చేపట్టామని తెలిపారు. నవంబర్ 26న రాజ్యాంగ దినోత్సవం సందర్భంగా రెండో విడత ఇందిరమ్మ చీరల పంపిణీకి ఏర్పాట్లు చేస్తున్నట్లు వెల్లడించారు. ఆర్టీసీలో మహిళలకు ఉచిత ప్రయాణం, కొత్త రేషన్ కార్డులు, సన్నబియ్యం పంపిణీ, ఇందిరమ్మ ఇళ్ల నిర్మాణం వంటి పథకాలను వివరించారు.
రైతులకు అండ.. యువతకు ఉద్యోగాలు
రైతుల రుణమాఫీ కోసం రూ.20 వేల కోట్లు ఖర్చు చేశామని, సన్నవడ్లకు క్వింటాలుకు రూ.500 బోనస్ అందిస్తున్నామని సీఎం తెలిపారు. 50 లక్షల కుటుంబాలకు 200 యూనిట్ల ఉచిత విద్యుత్ అందిస్తున్నామని పేర్కొన్నారు. వ్యవసాయ రంగానికి ప్రాధాన్యత ఇస్తూ రైతుల ఆర్థిక పరిస్థితిని మెరుగుపరిచేందుకు చర్యలు తీసుకుంటున్నట్లు చెప్పారు.
యువతకు ఉపాధి కల్పించడమే లక్ష్యంగా ఇప్పటివరకు 75 వేల ఉద్యోగాలను భర్తీ చేసినట్లు వెల్లడించారు. విద్య, ఉపాధి, వ్యవసాయం, మహిళా సంక్షేమ రంగాల్లో ప్రజా ప్రభుత్వం నిరంతరం పనిచేస్తోందని వివరించారు.
మల్లన్నసాగర్ నిర్వాసితులకు భరోసా
సిద్దిపేట జిల్లా ప్రజలు ఎంతోకాలంగా ఎదురుచూస్తున్న మల్లన్నసాగర్ నిర్వాసితుల సమస్యను ముఖ్యమంత్రి ప్రస్తావించడం సభలో ప్రాధాన్యత సంతరించుకుంది. నిర్వాసితులందరికీ ఇందిరమ్మ ఇళ్లు మంజూరు చేస్తామని, అధికారులను గ్రామాలకు పంపించి బాధితుల వివరాలు సేకరిస్తామని హామీ ఇచ్చారు. పెండింగ్లో ఉన్న పరిహారాన్ని పూర్తిస్థాయిలో చెల్లిస్తామని స్పష్టం చేశారు. ఈ హామీ నిర్వాసితుల్లో కొత్త ఆశలు రేకెత్తించింది.
సిద్దిపేట నుంచి గెలిచిన ఎమ్మెల్యేకు మంత్రి పదవి
సిద్దిపేట రాజకీయాలపై కూడా ముఖ్యమంత్రి కీలక వ్యాఖ్యలు చేశారు. సిద్దిపేట నుంచి గెలుపొందిన ఎమ్మెల్యేకు రాబోయే ప్రభుత్వంలో మంత్రి పదవి ఇస్తానని ప్రకటించారు. 2029లో మరోసారి ఇందిరమ్మ రాజ్యాన్ని తీసుకొస్తామని, రెండోసారి ప్రజాపాలన జెండా ఎగురవేస్తామని ధీమా వ్యక్తం చేశారు. సిద్దిపేట జిల్లాలో కాంగ్రెస్ పార్టీ బలోపేతానికి కృషి చేస్తామని, అభివృద్ధి, సంక్షేమమే తమ ప్రభుత్వ ప్రధాన లక్ష్యమని పేర్కొన్నారు.
మంత్రుల వినతులు.. అభివృద్ధిపై దృష్టి
మంత్రి గడ్డం వివేక్ వెంకటస్వామి సిద్దిపేట మున్సిపాలిటీ అభివృద్ధికి రూ.50 కోట్లు మంజూరు చేయాలని, మల్లన్నసాగర్ నిర్వాసితులకు పెండింగ్ పరిహారం చెల్లించాలని ముఖ్యమంత్రిని కోరారు. మంత్రి పొన్నం ప్రభాకర్ గౌరవెల్లి, గండేపల్లి ప్రాజెక్టుల పనులు పూర్తి చేయాలని, ఇతర ప్రాజెక్టుల నిర్వాసితులకు న్యాయం చేయాలని విజ్ఞప్తి చేశారు.
పీసీసీ అధ్యక్షుడు మహేష్ కుమార్ గౌడ్, మంత్రులు దామోదర రాజనర్సింహ, సీతక్క, పొంగులేటి శ్రీనివాసరెడ్డి తదితరులు ప్రభుత్వ పథకాలు, అభివృద్ధి కార్యక్రమాలను వివరించారు.
రాజకీయంగా ప్రాధాన్యత సంతరించుకున్న సభ
సిద్దిపేట రాజకీయ చరిత్రలో బీఆర్ఎస్కు బలమైన పట్టున్న ప్రాంతంలో ముఖ్యమంత్రి రేవంత్ రెడ్డి నిర్వహించిన ఈ బహిరంగ సభ రాజకీయంగా ప్రాధాన్యత సంతరించుకుంది. ఒకవైపు గత ప్రభుత్వ పాలనపై విమర్శలు, మరోవైపు ప్రస్తుత ప్రభుత్వ అభివృద్ధి, సంక్షేమ కార్యక్రమాల ప్రస్తావన, ఇంకోవైపు 2029 రాజకీయ లక్ష్యంపై ప్రకటనతో సభ సాగింది. ముఖ్యంగా సిద్దిపేట అభివృద్ధి, మల్లన్నసాగర్ నిర్వాసితుల సమస్యలు, వైద్య కళాశాలకు మదన్ మోహన్ రావు పేరు, స్థానిక ఎమ్మెల్యేకు మంత్రి పదవి హామీ వంటి అంశాలు ప్రజల్లో చర్చనీయాంశాలుగా మారాయి.
ఈ కార్యక్రమంలో మంత్రులు, ఎమ్మెల్యేలు, పీసీసీ అధ్యక్షుడు, జిల్లా కలెక్టర్ కె. హైమావతి, పోలీస్ కమిషనర్ సాధన రష్మీ పెరుమాళ్, ఇతర ప్రజాప్రతినిధులు, అధికారులు, కాంగ్రెస్ నాయకులు, కార్యకర్తలు, ప్రజలు పెద్ద సంఖ్యలో పాల్గొన్నారు.
సూర్య న్యూస్ : సిద్దిపేట అర్బన్ - దేవులపల్లి భూపతి