సెయింట్ ఆంథోనీ పాఠశాలలో వైభవంగా బాలల దినోత్సవ వేడుకలు

సదాశివపేట;పట్టణంలోని సెయింట్ ఆంథోనీస్ పాఠశాలలో నవంబర్ 14న బాలల దినోత్సవ వేడుకలను అత్యంత వైభవంగా నిర్వహించారు. భారత తొలి ప్రధానమంత్రి పండిట్ జవహర్‌లాల్ నెహ్రూ జయంతిని పురస్కరించుకొని నిర్వహించిన ఈ వేడుకలకు పాఠశాల చైర్మన్ ఇ. ఆంటోనీ రెడ్డి ముఖ్య అతిథిగా హాజరయ్యారు.ఈ సందర్భంగా ఆంటోనీ రెడ్డి మాట్లాడుతూ.. బాలల దినోత్సవ ప్రాముఖ్యతను విద్యార్థులకు వివరించారు. నేటి బాలలే రేపటి పౌరులని, విద్యార్థులు క్రమశిక్షణతో చదువుకుంటూ జీవితంలో ఉన్నత శిఖరాలను అధిరోహించాలని సూచించారు. విలువైన విషయాలను తెలియజేస్తూ విద్యార్థుల్లో స్ఫూర్తిని నింపారు.వేడుకల్లో విద్యార్థులు ఎంతో ఉత్సాహంగా పాల్గొని తమ ప్రతిభాపాటవాలను ప్రదర్శించారు. చిన్నారులు ప్రదర్శించిన వివిధ రకాల నృత్యాలు, సాంస్కృతిక కార్యక్రమాలు ఆహూతులను విశేషంగా ఆకట్టుకున్నాయి. పాఠశాల ప్రాంగణం విద్యార్థుల ఆటపాటలు, కేరింతలతో సందడిగా మారింది.అనంతరం విద్యార్థుల ప్రతిభను పాఠశాల ప్రిన్సిపల్ అభినందించారు. ఇలాంటి కార్యక్రమాలు విద్యార్థుల్లో ఆత్మవిశ్వాసం, సృజనాత్మకతను పెంపొందించేందుకు దోహదపడతాయని పేర్కొన్నారు.ఈ కార్యక్రమంలో పాఠశాల అధ్యాపకులు, విద్యార్థులు పెద్ద సంఖ్యలో పాల్గొని బాలల దినోత్సవ వేడుకలను విజయవంతం చేశారు.